ISekhukhune kuzomele iqaphele isihibe esikhube iMarumo Gallants
By Sihle Ngubo
Ukudliwa kweMarumo Gallants yizembe kwiDStv Premiership ngempelasont kuyinto ebibonakala ukuthi izogcina yenzekile njengoba ibidlala kwiCaf Confederation Cup.
Leli qembu liphume kweyandulela owamanqamu kulo mqhudelwano, nokuyinto ebukeka ilenzele phansi kakhulu emidlalweni yasekhaya yeligi.
IMarumo Gallants beyenza kahle emidlalweni yeCaf kodwa ithi uma ibuyela ekhaya kukhale isibhaxu.
Kugcine konakele ngoMgqibelo ngesikhathi ishaywa yiSwallows FC ngo 2-0 emdlalweni wokugcina weligi.
Ibidinga ukuwina lo mdlalo nobekuzokwenza iMaritzburg United kube iyona eshona phansi.
Okwenzeke kwiMarumo Gallants kumele kube yisifundo kwamanye amaqembu agijima kwiDStv Premiership.
Kuhle impela ukumela izwe lakho emidlalweni yeCaf kodwa kumele ubuye ubheke ukuthi akonakali yini kweyeligi.
Lokhu akuqali njengoba sekuke kwenzeka kwiBlack Leopards edlale kwiConfederation Cup kodwa kwagcina konakala kwiDStv Premiership.
Leli qembu laseLimpopo lisanda kudliwa yizembe, nomakhelwane balo iTshakhuma Tsha Madzivhandila kwiMotsepe Foundation Championship.
Lokhu kuchaza ukuthi la maqembu asezodlala kwi-ABC Motsepe League ngesizini ezayo.
Kuzoba nzima kakhulu ukuthi abuyele esigabeni esiphezulu kanti neMarumo Gallants kuzomele iqaphele isimo esifanayo ngesizini ezayo.
Njengamanje iMamelodi Sundowns, ebe ngompetha beligi, ne-Orlando Pirates, ephume isibili yibona abazodlala kwiCaf Champions League ngonyaka ozayo.
ISundowns iwashiswe ijezi yiWydad Casablanca kowandulela owamanqamu ngempelasonto ngemuva kokuthi umdlalo uphele ngo 2-2 eLoftus Stadium.
ISuperSport United izodlala kwiConfederation Cup ngemuva kokuqeda endaweni yesithathu kwiDStv Premiership. Izophelezelwa yiSekhukhune United ezodlala owamanqamu weNedbank Cup nePirates ngoMgqibelo.
Lokhu kuzokwenzeka noma ingawinanga iSekhukhune kowamanqamu ngoba iPirates seyivele izibekisele indawo kwiChampions League.
FUNDA NALA: Usevalelisile kwiTS Galaxy unozinti okhonjwa kwi-Orlando Pirates
Kufanele ukuthi iSekhukhune ikubonile okwenzeke kwiGallants ngakho kumele ikwazi ukubhalansisa izinto, ingazitholi seyilahlekelwa yilungelo lokudlala kwiDStv Premiership ekupheleni kwesizini ezayo.
Kuwumqansa kakhulu ukudlala imidlalo yeCaf ngoba iyakhathaza indlela eya enhla ne-Afrika.
