USamir Nurkovic uyozama inhlanhla kwiRaja kaZinnbauer
Njabulo Shezi
Umqeqeshi weRaja Athletic Club, uJosef Zinnbauer usememe umgadli owazakhela igama kwiKaizer Chiefs, uSamir Nurkovic ukuba azomhlola ngenhloso yokumsayina.
Lo mgadli onekhono uzoba yingxenye yeRaja uma seyiya ekhempini yokulungiselela eQatar ngokusho kwemithombo.
IRaja izobhekana ne-Al Sadd emdlalweni wobungani, ozohlinzeka ithuba elihle kuZinnbauer lokuhlola uSamir Nurkovic.
UZinnbauer uyamazi uSamir Nurkovic ngesikhathi esekwiPirates ngesikhathi lo mgadli eyisitha sakhe esikhulu edlala kwiChiefs.
Ukudlala kahle kukaNurkovic ngesikhathi esagijima kwiChiefs kufanele ukuthi yikho okwenze wadonsa amehlo kaZinnbauer.
Ikhono lakhe lokushaya amagoli limenza abe nethuba elihle lokubachaza abaqeqeshi beRaja esohlelweni lokwakha kabusha ngaphansi kukaZinnbauer.
Lezi zinkunzi zaseMorocco sezivele zisayinise uHashim Domingo obekwiMamelodi Sundowns ngesizini edlule. Kukhona noFadlu Davids ethimbeni labaqeqeshi.
USamir Nurkovic ubesemabhukwini eRoyal AM ngesizini edlule kodwa akazange abonakale emidlalweni esemthethweni kuleli qembu ngaphambi kokuthi kunqanyulwe inkontileka yakhe.
FUNDA NALA: UMlungisi Ngubane usola Usuthu ngokuziba ukuthenga abadlali
Ubeziqeqesha neCape Town Spurs muva nje kodwa u-Eric Tinkler akazange ahlabeke umxhwele ngaye, wanquma ukungamsayinisi lo mdlali odabuka eSerbia.
