Ikhohlisana ihlomile kubaqeqeshi bakuleli, kusho uMiddendorp

Umqeqeshi osemnkantshubomvu ebholeni lakuleli, u-Ernst Middendorp uthi abaqeqeshi bakuleli ababumbene futhi abasebenzisani.

Uthi abanabo ubudlelwano bokubambisana bengabaqeqeshi njengoba yena exoxa nababili noma abathathu kuphela.

Kwake axoxe nabo ubale uGavin Hunt weSuperSport United, Morgan Mammila weChippa United noRulani Mokwena weMamelodi Sundowns.

UMiddendorp ukhala ngokuthi bagcina ngokuvezelana amazinyo nje uma besemidlalweni kodwa nakhona lapho isuke ikhohlisana nje.

“Akukho ukuzwana phakathi kwabaqeqeshi eNingizimu Afrika,” ucashunwe esho kanje uMiddendorp yi-iDiski Times.

“Iqiniso nje wukuthi akukho nhlobo ukuzwana. Kungenzeka ke ukuthi kwenziwa wukuhlukana kweminyaka ngoba uGavin Hunt ngiyaxoxa naye.

“URulani Mokwena yena, wonke umuntu uyazi ukuthi sesiside isikhathi sixoxa naye kule minyaka edlule.

“Kodwa abekho abanye engingababala ngaphandle kwesengike ngasebenza nabo oMaahier noFadlu (izelamani zakwaDavids).

“Kukhona no(Morgan) Mammila… nabanye. Kodwa ngale kwalokho akukho ukubumbana.

“Sima ngapha nangapha emidlalweni, sibingelelane simoyizele kodwa nakho kusuke kuwukwenza nje.

“Akukho ukubumbana ngendlela okulindeleke ngayo,” kusho lo mqeqeshi odume ngokuba nolaka.

UMiddendorp, oseqeqeshe emaqenjini amaningi kuleli okubalwa neKaizer Chiefs, bakhona abaqeqeshi ake wahilizisana nabo.

Omunye walabo nguPitso Mosimane ngesikhathi esaqeqesha iMamelodi Sundowns kodwa bayahloniphana.