Uthembisa isibhakela esisezingeni uDladla ngoDisemba 9
ALFRED NGUBANE
Selugcine lubekiwe usuku abathandi bezamankomane KwaZulu-Natal abakade balulinda la kuzohluthulana khona umculi uBig Zulu nosomabhizinisi uPhumlani Njilo.
Le mpi, nezinye ezizodonsa amehlo, ziqhathwe uHlula “Mholi” Dladla weHlula Dladla Boxing Promotion kanti zizoba seThekwini ngoDisemba 9.
Impi kaBig Zulu noNjilo seyivele idonse amehlo kusukela yamenyezelwa ezinyangeni ezimbalwa ezidlule.
Seyivele ibhekwe ngamehlo abomvu njengoba osaziwayo abaningi sebekuvezile ukuthi nakanjani bafuna ukuyibuka bukhoma.
Lena kuzoba yimpi yokuqala yosaziwayo eKZN. Kwezinye izimpi eziqavile kule kukhona impi yosuku yebhande elingaphethwe ngumuntu leWBA Pan Africa.
Le mpi yona izoba phakathi kukaLindelani Sibisi waseDundee noSange Ngoza waseDuncan Village, e-Eastern Cape.
Nazi ezinye izimpi zangalolu suku: Sboniso “Tiger” Gonya v Mduduzi Mzimela; Sandile Dumisani v Siphesihle Mntungwa; Mapule “Thunder” Ngubane v Rita Mrwebi; Simphiwe Mbhele v Philelani Khumalo.
Kulindeleke ukuthi izinkumbi zabalandeli nabathandi besibhakela babhekise amabombo ngasolwandle la kushaya khona umoya la lezi zimpi zizobanjelwa khona.
Ekhuluma neMpempe, uDladla uthi amalungiselelo ahamba kahle kakhulu. Uphinde wengenza ngokuthi lezi zimpi sezisize amabhokisa abezobhuqwa yindlala njengoba kuza amaholidi kancibijane nje.
“Kodwa ngokuqhatha lezi zimpi sesiwahlengile la mabhokisa. Abantu abathanda isibhakela ngeke nakancane bazisole.
“Isibhakela sizobe siqhwiza umentshini okwangempela kulezi zimpi,” kusho uDladla.
Amathikithi aseyatholakala ezindaweni ezidayisa amathikithi ezifana noWeb Tickets nePick n Pay.
FUNDA NALA: Sekugcine kuvunyelwene ngeMandela Day Marathon
Ajwayelekile abiza u-R150 kanti awezicubuthwane ezifisa ukuhlala eduze neringi abiza uR800 lilinye.
