Usethole omunye umsebenzi obegaqelwe yiChiefs
Omunye wabaqeqeshi okubiikwa ukuthi ugaqelwe yiKaizer Chiefs, usesayine nelinye iqembu, okusho ukuthi ngeke esatholakala eNaturena.
UVanderlei Luxemburgo, okubikwa ukuthi ufunwa yiKaizer Chiefs, usamukele isicelo seClub Deportivo Tricolor yaseChile ukuba azoyiqeqesha ngesizini ezayo.
Lokhu kusho ukuthi luyehla uhlu lwabaqeqeshi leli qembu laseNaturena elizohlunga kubo ozothatha izintammbo kuCavin Johnson ngesizini ezayo.
Njengoba sike sabika phambilini, lo mqeqeshi osemnkantshubomvu waseBrazil uhlonzwe njengomunye wababonwa bengavusa iKaizer Chiefs.
Lo mqeqeshi waseBrazil ubengenaqembu kusukela eshiye kwiCorinthians ngoSepthemba wanyakenye.
Nokho ezakamuva eziqhamuka eeNingizimu yeMelika zithi uLuxemburgo utshele umngane wakhe asondelene naye ukuthi uzojoyina i-Club Deportivo Tricolor yaseChile.
ULuxemburgo ungumqeqeshi ohamba phambili ngezindebe kwiCampeonato Brasileiro Série A njengoba enezinhlanu nje.
Khonamanjalo, iKaizer Chiefs isamataniswa namanye amagama aqavile kuwo okukhona elikaPitso Mosimane, Benni McCarthy, Manqoba Mngqithi noJose Peseiro.
Njengamanje uMosimane unenkontileka ne-Abha FC yaseSaudi Arabia kuze kuphele le sizini.
UMcCarthy kubikwa ukuthi uzoyishiya kwiManchester United uma kuphela inkontileka yakhe ngoJuni.
Umqeqeshi wasePortugal, uPeseiro, yena uvele akanaqembu njengamanje kulandela ukushiya kwakhe eqenjini lesizwe laseNigeria ngoFebhuwari.
Umqondisi weChiefs, uKaizer Motaung Junior ukuqinisekisile ngesonto elidlule ukuthi bazobe benethimba elisha labaqeqeshi ngesizini ezayo.
FUNDA NALA: UKlopp usola iMan United ‘ngokukhubaza’ iLiverpool
Ukuthi lelo thimba lizobe liholwa ngubani ngenye yezinto ezibhekwe kakhulu ebholeni laseNingizimu Afrika njengamanje.
