IChiefs seyigcine imxoshile uCavin Johnson
SIHLE NGUBO
Obengumqeqeshi weKaizer Chiefs obebambile ngesizini edlule, uCavin Johnson, usehlukene naleli qembu laseNaturena.
Lo mqeqeshi ubethathe izintambo kuMakhosi ngemuva kokuxoshwa kukaMolefi Ntseki ngasekuqaleni kwesizini edlule. Nokho ngaphansi kwakhe iqembu liqhubekile nokungenzi kahle laze lahluleka ukuqeda kwiTop 8.
Bekungathi uzohlala uJohnson kwiChiefs aqhubeke nomsebenzi wakhe wokuba yinhloko yenkulisa. Nokho ushintsho olwenzeka eNaturena kusobala ukuthi lumchithile lo mqeqeshi.
IChiefs kulindeleke ukuthi imemezele umqeqeshi omusha ozobe ehamba nethimba lakhe labaqeqeshi. Ngaphezu kwalokho kulindeleke ukuthi iqembu limemezele abadlali abasha njengoba bekhona asebechithiwe.
Kulabo badlali kukhona uKeagan Dolly uSiyethemba Sithebe noSifiso Hlanti. Bonke bebephelelwa yizinkontileka kodwa batshelwa ukuthi ngeke zisavuselelwa.
U-Itumeleng Khune naye ayikavuselelwa inkontileka yakhe neChiefs nokushiya imibuzo ukuthi ngabe uzohlala yini kuleli qembu laseNaturena. Inkontileka kaKhune iphele ngoJuni 30.
