Kuphele nya ngeMaritzburg United ebholeni

PHILI HLONGWANE

Kuphelile ngegama elithi iMaritzburg United njengoba leli qembu selizobizwa ngeDurban City FC.

I-Premier Soccer League (PSL) seyivumile ukushintsha igama leTeam of Choice, egijima kwiMotsepe Foundation Championship, kanti leli qembu lizofudukela eThekwini.

Impempe ike yabika ngenyanga edlule ukuthi abeMaritzburg bebehlela ukuwuduba uMgungundlovu bafudukele eThekwini, bashintshe negama leqembu.

Bebekhala ngokunganakwa eMgungundlovu nokuthi sebaphucwa nenkundla iHarry Gwala Stadium esisetshenziswa yiRoyal AM.

“Uma bengayidedeli inkundla (iHarry Gwala Stadium) nakanjani iqembu lizothuthela eThekwini. Alidayisi kodwa into engenzeka ukushintsha igama,” kusho umthombo osendelene neTeam of Choice ngenyanga edlule.

Umasipala waseMgungundlovu sewushade neRoyal AM, kanti ubungasayingeni indaba yeTeam of Choice eseyizokwaziwa ngeDurban City FC. Leli qembu lihlulekile ukubuyela kwiPremiership kulandela ukudliwa yizembe ngesizini ka-2022/2024.