ITheku lizothola umdlalo owandulela owamanqamu weMTN 8
I-Premier Soccer League (PSL) seyiqinisekise izinsuku, izinkundla nezikhathi okuzodlalwa ngazo imidlalo eyandulela owamanqamu weMTN 8 ka-2024.
ICape Town City izokwamukela i-Orlando Pirates eDHL Cape Town Stadium, emlenzeni wokuqala ngo-Agasti 27, ngo-7 ebusuku. Umlenze wesibili uzokuba se-Orlando Stadium, ngoMgqibelo ngo-Agasti 31, ngo-3 ntambama.
Komunye umdlalo owandulela owamanqamu iMamelodi Sundowns izobhekana neStellenbosch FC emlenzeni wokuqala eLucas Moripe Stadium, ngo-Agasti 28. Umlenze wesibili uzokuba seMoses Mabhida Stadium, ngoSepthemba 1, ngo-3 ntambama.
Abalandeli baseThekwini bazothokoza ukuba nomdlalo weMTN 8 okuyinto abebengayilindele ngoba alikho iqembu lakulesi sifundazwe eliqede kwiTop 8.
IBucs ifinyelele kweyandulela owamanqamu ngokushaya iSuperSport United, kanti iCape Town City inqobe kwiSekhukhune United. I-Downs ishaye iPolokwane City kwathi iStellenbosch yashaya iTS Galaxy.
Amathikithi emidlalo eyandulela owamanqamu asekhona eTicketPro, kanti abiza u-R80 lilinye.