AmaProteas angcolise irekhodi eshaywa ‘amavukana’ i-Ireland

AmaProteas angcolise irekhodi eshaywa ‘amavukana’ i-Ireland
UDABA: Thabiso Ngcobo
ISITHOMBE: Twitter

AmaProteas angene ahlazweni ethelwa othulini ‘amavukana’ i-Ireland ngama-run angu-43 emdlalweni wesibili wosuku olulodwo obuseMalahide Cricket Club ngoLwesibili.

I-Ireland isihamba phambili ngo 1-0 kulolu chungechunge lwemidlalo emithathu yosuku olulodwa. Umdlalo wokuqala waphazanyiswa yimvula.

Elakuleli bekungokokuqala emlandweni liguqiswa yi-Ireland. Emidlalweni emihlanu edlule, amaProteas aziphuzela isobho kodwa izinto zigaye ngomunye umhlathi ngoLwesibili.

Ukaputeni welakuleli, uTemba Bavuma uwine ithosi wabe eseqoka ukushwiba kuqala. I-Ireland idlale ingcwenga yekhilikithi ihlanganisa ama-run angu-290 kuma-over angu-50 kusawe amawikhethi amahlanu.

Ukaputeni we-Ireland u-Andy Balbirnie nguye ubeyiphela endlebeni kumaProteas njengoba eshaye ama-run angu-102 emabholeni angu-117 walekelelwa uHarry Tractor noGeorge Dockrell ababhalise ama-run angu-79 nangu-45 emabholeni angu-68 nangu-23 ngokulandelana.

FUNDA NALA: UNjabulo Blom uthi ukubona usizi lwakwamanye amazwe kubaqinisile beyiqembu

Amawikhethi amaProteas athathwe nguKagiso Rabada, Keshav Maharaj Tabraiz Shamsi no-Andile Phehlukwayo othathe amabili. AmaProteas ahluleke ancama ukujaha isibalo sama-run angu-290 abeshaywe ngosokhaya kwaze kwaba aphuma wonke esenze ama-run angu-247.

URassie Van Der Dussen noJanan Malan bazamile kodwa bangakuthola ukwesekwa. Umdlalo wokugcina uzoba ngoLwesihlanu ngo-11.45am e-Malahide Cricket Club.

EMAIL: Editor@impempe.com TWITTER: @impempe_com FACEBOOK: Impempe SA

Leave a Reply

Your email address will not be published.