IChiefs ayivunyelwe ukubeka imiconjwana yayo eMorocco

EzikaBobby Motaung iKaizer Chiefs azivunyelwe ukulubhada eMorocco

SIHLE NDLOVU

Sekusheshe kwavela obekwenza iRoyal Moroccan Football ingacacisi ngohambo lweKaizer Chiefs olubheke eMorocco nokuyilungisela ama-visa.

IChiefs iphoqeleke ukuthi ihlehlise uhambo lwayo oluya eMorocco, lapho iyodlala khona umdlalo weCAF Champions League, ngenxa yenkinga yama-visa.

IChiefs bekumele ihambe ngoLwesithathu ntambama ukuze ithole isikhathi sokuzinza nokuziqeqesha eMorocco.

IRoyal Moroccan Football Federation igcine iqinisekisile ukuthi iChiefs ngeke ivunyelwe ukungena kuleliya zwe. I-CAF iyona esizocacisa ngokuthi kuzokwenzekani ngomdlalo obuzodlalwa weCAF Champions League. Akucaciswanga ukuthi yini iChiefs ingavunyelwe ukuya eMorocco kodwa maningi amathuba okuthi isimo seCoronavirus yisona esiholele kulokhu.

Ngokwesitatimende esikhishwe yiChiefs ngoLwesithathu, yenze konke okusemandleni ukubambisana nososeshini waseMorocco neziphathimandla zakhona kodwa kwanhlanga zimuka nomoya. Leli qembu laseNaturena lizobhekana neWydad Athletic emdlalweni wokuqala kweyamaqoqo kwiCAF Champions League.

“Ngenxa yokubambezeleka kokwenziwa kwama-visa okuya eMorocco, nokungaxhumani kahle neMoroccan Football Federation, neziphathimandla ezibandakanyekayo, iKaizer Chiefs isale ingenakho ukwenza ngokunye ngaphandle kokuhlehlisela uhambo usuku olulandelayo. Lokhu kuzokwenzeka uma konke kuzosombululeka ngendlela isimo, kuphinde kube nokuxhumana kulabo abathintekayo,” kusho isitatimende seChiefs.

“IKaizer Chiefs ingakuqinisekisa ukuthi ikwenze konke obekudingeka ukuze lube khona lolu hambo. Lokhu kubandakanya nemigomo yeCovid-19 ethinta lolu hambo.

“Ngemuva kwakho konke ukuhlela nokulinda eMoroccan Embassy, ePitoli, iqembu alikawatholi ama-visa alivumela ukuthi lingene eMorocco ukuze liyodla umdlalo walo wokuqala wamaqoqo neWydad Athletic.

“Iqembu lidunguza ebumnyameni njengoba ukuxhumana kungekho nhlobo, futhi iqembu neSafa bengakaze bathole lutho oluvela kwiziphathimandla zaseMorocco mayelana nalolu daba

“Sizoqhubeka nokusebenzisana neSafa namahhovisi enxusa lakuleli elizinze eMorocco, bese sizama nokukhuluma neCAF ukuze lolu daba luxazululeke. Iqembu lisalinde ukuthola ama-visa futhi lizoqhubeka nokuzama ukuwathola kwiMoroccan Embassy ePitoli kusasa (ngoLwesine) ekuseni. Njengoba iqembu lisalindile liqhubekile nokuziqeqesha ntambama (ngoLwesithathu) ukulungiselela uhambo,” kuphetha isitatimende.

Umdlalo phakathi kweWydad neChiefs bekumele ube ngoMgqibelo ngo-9 ebusuku. IChiefs sekufanele ilinde isinqumo seCAF njengoba sekucacile ukuthi ngeke ilubhade eMorocco.

sihle@impempe.com

Twitter: @NtwanaSihle

Leave a Reply

Your email address will not be published.