IMathaithai iyincwadi evaliwe kwiSundowns koweNedbank

UTeboho Modise (kwesokudla)
Sihle Ndlovu

IMathaithai FC, ezobhekana neMamelodi Sundowns emdlalweni weNedbank Cup Last 16, ingaba yingozi kakhulu ngoba iyiqembu elingaziwelwa lutho.

La maqembu azotholana phezulu eLucas Moripe Stadium, ePitoli, ngoLwesibili ngo-6 ntambama. Okokuqala iMathaithai idlala kwiNedbank Cup kanti igijima kwi-ABC Motsepe League, eFree State.

IMathaithai ifike kwiLast 16 ngemuva kokushaya iNC Pro’s (yaseNorthern Cape) ngo 2-0 emdlalweni weLast 32 yalo mqhudelwano ngoFebhuwari 12.

Abanye babadlali abayingozi beSebethe Boys (njengoba itekekiswa kanjalo iMathaithai) uTeboho Modise noSabata Monele. Bobabili laba bashaye amagoli emdlalweni weLast 32.

Abafana Ba-Style bazoya kulo mdlalo besazikhotha amanxeba ngemuva kokushaywa yiMaritburg United ngo 2-1 emdlalweni weDStv Premiership ngempelasonto.

Bekungokwesibili kuphela iSundowns ishaywa kule sizini kuyo yonke imuqhudelwano. Komunye umdlalo weligi ishaywe AmaZulu FC ngo 1-0.

Inkinga ebuye ibe khona ngokudlala namaqembu ama-amesha, ukuthi awakuniki ithuba lokudlala ibhola ngendlela yakho. Amanye ayabhuduzela futhi azivala ngokushesha izikhala zokuphaselana ibhola.

Nokho ekugcineni iSundowns izoya kulo mdlalo ithwelwe ngeqoma ngemuva kokushaya iRichards Bay FC ngo 4-0 emdlalweni weNedbank Cup Last 32.

ISundowns kuzomele iqaphele nokho ukuthi iSebethe Boys ingayibangeli aMathaithai azoyifaka ehlazweni lokuwasha ijezi kwiNedbank Cup.

editor@impempe.com

 

 

Leave a Reply

Your email address will not be published.