Inkakha kwezokusubatha ifuna i-ASA iphathwe abagijimi

UJosia Thugwana noCarol Manana

OKADONGA GUMBI

Owayeyisihlabani somgijimi kuleli, uJosia Thugwane ukholwa wukuthi kumele kube yinhlanganisela efaka nabasubathi phakathi ehola inhlangano eyengamele ezokusubatha eNingizimu Afrika, i-Athletics South Africa.

UThugwana, owawina indondo yeGolide kuma-Olympics ayese-Atlanta ngo-1996, uthi kumele le nhlangano iphathwe ngabantu abazobeka izidingo zabasubathi phambili, wabe esenxenxa abagijimi ukuba bangasabi ukungenela ukhetho lokwengamela i-ASA. Ukhetho lobuholi obusha be-ASA luzoba ngoMeyi 8.

“Ngezikhathi zethu ibhodi (le-ASA) lalilwela futhi libeke izidingo zabasubathi phambili,” kusho uThugwana ekhuluma nabeTop Runner. “Sekujike kakhulu manje.

“Ngingajabula ukubona imijaho yamabanga ango-10km no-15km ibuya bese abawinile bakhokhelwe imali esile hhayi o-R200. Kumele bakhokhelwe kusuka ku-R10 000 ngoba kunezindleko abasuke bengene kuzo ukufika emjahweni.

“Ibhodi lakudala lalihlala lithungatha abaxhasi ukuze ezokusubatha zihehe, kodwa kulezi zinsuku sebehlale begqoke amasudi bekhankasela izikhundla.

“Ngingafa ngijabule uma ezokusubatha zingabuyela ezandleni ezifanele. Ukukhuluma iqiniso nje, lo mdlalo uyafa kancane kancane,” kucacisa uThugwana oneminyaka engu-49, ozalwa eBethal, eMpumalanga.

Akayizwa nhlobo ke nje eyokuthi kubuyiselwe u-Aleck Sikhosana ekuphatheni ihlandla lesibili kule nhlangano, kanti uncome nesenzo sikaKhotso Mokoena sokumgenela ukhetho lokuba yilungu lebhodi le-ASA.

“Yinto enhle ukuthi uMokoena useveze isifiso sokuthatha indawo ebhodini. Usemncane, unolwazi futhi usebuya khona enkundleni. Yize ngingenanxa noSikhosana, ngicabanga ukuthi iminyaka elishumi kuphethe umuntu oyedwa seyimide kakhulu.

“Nokho kulele kwizifundazwe ukuthi ziyamvotela noma cha. Ngingajabula kodwa ukubona kuqokwa umuntu omusha.

“Engingaluleka ngakho abazovota wukuthi bengathathwa yisisoka solukhuluma kodwa bakhethe abantu abazi umsebenzi abazokhulisa ezokusubatha.

“Izethembiso sesike sazizwa naphambilini, umsebenzi webhodi ukuphuma lithungatha abaxhasi,” kuphetha uThugwana.

Email: Editor@impempe.com

Twitter: @impempe_com

Facebook: Impempe

Leave a Reply

Your email address will not be published.