ISri Lanka sihujiswe utalagu amaProteas ebuyisa izinduku eColombo

ISri Lanka sihujiswe utalagu amaProteas ebuyisa izinduku eColombo
Abadlali bamaProteas
UDABA: Thabiso Ngcobo
ISITHOMBE: Twitter

Kugqame uJanneman Malan amaProteas ebuyisa izinduku eguqisa iSri Lanka ngama-run angu-67 emdlalweni wesibili wosuku olulodwa eColombo.

Umdlalo wokuqala wawinwa iSri-Lanka okwawenza ahamba phambili ngo 1-0 kulolu chungechunge lwemidallo emithathi.

Kodwa njengoba amaProteas eselinganisile nje sekuchaza ukuthi konke sekuzocaca ngoLwesibili emdlalweni wokugcina ukuthi yiliphi elihamba nalolu chungechunge.

Ukaputeni wamaProteas bekunguKeshav Maharaj, obethathe endaweni kaTemba Bavuma obengekho ngenxa yokulimela emdlalweni wokuqala.

UMaharaj uwine ithosi wabe eseqoka ukubhetha kuqala. EzikaMark Boucher zibhalise ama-run angu-283 sekuwe amawikhethi ayisithupha ngemuva kwama-over angu-47 njengoba enciphisiwe ngenxa yesikhathi.

UMalan no-Aiden Markram baqale ngegiya eliphansi bebhalisa ama-run angu-43 njengoba uMarkram egcine ekhishwe uChamika Karunaratne esenze ama-run angu-21.

Ukungena kukaReeza Hendricks kwenze umehluko omkhulu njengoba benoMalan bekwazile ukubhalisa ama-run angu-50 umdlali ngamunye.

Lokhu kwenze iqembu laba nama-run angu-139 kusawe iwikhethi eyodwa ngaphambi kokuba uHendricks aphume esenze ama-run angu-51 emabholeni angu-54.

URassie van der Dussen ungenile wahlanganisa ama-run 16 ngaphambi kokuba aphume. UMalan uqhubekile nomdlalo omuhle ehlanganisa ama-run angu-100 okungekwesithathu emdlalweni yosuku olulodwa.

UHenrick Klaasen ubhalise ama-run angu-43 ngaphambi kokuba uMalan egcine ephumile esenze ama-run angu-121 emabholeni angu-135.

Kube sekungena uWiaan Mulder no George Linde abahlanganise ama-run angu-14 kwi-over yokugcina.

FUNDA NALA: ULoveness ubengaze abuyele emuva ayobahlangabeza kwiPrince Mangosuthu Marathon

ISri Lanka ihluleke yancama ukubhalisa ama-run angu-284 njengoba igcine benze ama-run angu-197 sebephume bonke.

UTabraiz Shamsi nguye ubeyiphela endlebeni kwiSri-Lanka ethatha amawikhethi amahlanu walandelwa uKagiso Rabada namabili kwathi uMulder wabhalisa eyodwa.

Umdlalo wokugcina phakathi kwalama qembu uzoba ngoLwesibili ngo-11 ekuseni khona eColombo.

EMAIL: Editor@impempe.com | TWITTER: @impempe_com | FACEBOOK: Impempe SA

Leave a Reply

Your email address will not be published.