Ukhonjwe afika ngayo e-India uBaxter wodumo kwiChiefs

UStuart Baxter okhonjwe afika ngayo kwi-Odisha FC yase-India

OKADONGA GUMBI

Ibhantshi ligcwale umoya kowayengumqeqeshi weBafana Bafana, uStuart Baxter, obeqeqesha i-Odisha FC, edlala kwi-Indian Super League, e-India.

UBaxter uzingenisele yena amanzi ngomsele ngesikhathi ekhuluma budedengu ngokudlwengula okuyisihlava esibi okuthiwa sidla lubi e-India.

Lo mqeqeshi owazakhela udumo kuleli ngempumelelo yakhe kwiKaizer Chiefs nakwiSuperSport United, ubekhuluma ngemuva komdlalo weqembu lakhe ngoMsumbuluko ebusuku, ekhala ngephenathi abancishwe yona.

UBaxter oneminyaka engu-67 ujoyine leli qembu ngo-Agasti 2020, kanti uzwakalise ukungenami ngonompempe abebephethe umdlalo ngesikhathi iqembu lakhe lishaywa yiJamashadpur ngo 1-0 ngoMsombuluko.

“Kwesinye isikhathi ufisa ezinye izinqumo zinikwe wena kodwa akwenzekanga,” kusho uBaxter ekhuluma nabeStar Sports TV ngemuva komdlalo weligi la i-Odisha ishaywe khona ngo 1-0 yiJamshedpur.

“Angazi thina soyinikwa mhla kwenzenjani iphenathi. Ngicabanga ukuthi kumele oyedwa wabadlali bami kube khona amdlwengulayo noma kudlwengulwe yena uqobo ukuze sinikwe iphenathi,” uqhube kanje lo mqeqeshi wase-England.

Ukuxoshwa kukaBaxter kwi-Odisha kuchaza ukuthi usengaqashwa kunoma yiliphi iqembu elimfunayo. Ngeke kumangaze uma lo mqeqeshi engathushuka eNingizimu Afrika ngoba uyazifela ngokusebenza kuleli.

Akusikhona okokuqala uBaxter ekhuluma ichilo e-India njengoba phambili eke wasolwa ngokucwasa kodwa iqembu lakhe lamvikela kulokho.

Kulokhu iqembu lizihlangulile lathi alihambisani neze nokushiwo uBaxter, futhi lizothatha izinyathelo zangaphakathi eqenjini mayelana nale nkulumo yakhe.

“Akwemukelekile neze (okushiwo uBaxter), noma ngabe uqonde ukuthini, futhi akuhambisani nezinseko zeqembu. Thina la kwi-Odisha FC, sixolisa kakhulu futhi abaphathi beqembu bazobhekana nalolu daba ngokushesha,” kusho i-Odisha kwiTwitter.

I-Odisha ibhekene nezembe njengoba kuyiyo esemsileni kwiSuper League, isaqoqe amaphuzu ayisishiyagalombili emidlalweni engu-14. Sekusele imidlalo eyisishiyagalombili iphele iligi.

UCole Alexandra owayegijima kwiPlatinum Stars nakwiSuperSport kuleli, walandela uBaxter kuleli qembu lase-India.

 

Leave a Reply

Your email address will not be published.