UMhango ubuhlungu ngokuba iqaqa kwiPirates

UMhango ubuhlungu ngokuba iqaqa kwiPirates
UGabadinho Mhango
UDABA: OkaDonga Gumbi
ISITHOMBE: Twitter 

UGabadinho Mhango sekuvele ukuthi uzobona esephenduke iqaqa kwi-Orlando Pirates njengoba ijezi eselizwa ngendaba nje.

Lo mgadli kuthiwa useqalile ukubonakala ukuthi useyazwela ngokukhishwa kwakhe inyumbazane futhi usehlale enyukubele nje.

Uphenduke iqaqa nje uMhango ubekade engumgadli ohamba phambili kuleli qembu kule minyaka embalwa edlule.

Nokho isehlakalo la azithola khona esevalelwe endaweni yokucima ukoma ngenxa yokwehluleka ukukhokhela isikweletu kumakhele igazi elibi eqenjini.

UMhango kuthiwa wayekhiphe amantombazane amahle acwayiza ngezinkophe zokwakhiwa kwenye indawo yasePitori.

Kodwa kwathi sekumele kukhokhwe kwatholakala ukuthi inkunzimalanga ayinayo imali eyanele.

Udaba lwakhe lwagcwala kwabezindaba kanti lokhu abaphathi bePirates abakuthandanga.

Wabe eseqondiswa izigwegwe yiqembu isigwebo kwaba wukumiswa amaviki ambalwa.

Ekubuyeni kwakhe usekuthole kunzima ukubuyela eqenjini njengoba sekuthenjelwe kuTshegofatso Mabasa noKwame Peprah.

“Uyambona nje ukuthi izinto azihambi kahle kuye,” iPhakaaathi icaphume umthombo wayo usho kanje.

“Akaseyena lo Gaba esimaziyo. Usevele eze nje ejimini, enze lokho okumele akwenze bese ebuyela ekhaya ngoba uyazi vele ukuthi ngeke adlale.

“Engikubonile nengikuthandile ngaye nokho wukuthi wenza konke akutshelwayo ejimini ngaphandle kokukhombisa ukungenami.

FUNDA NALA: IChiefs izothola izinkanyezi ejezini layo

“Uyazi umsebenzi wakhe lo futhi uyawuhlonipha yize umzimba ukhombisa ukungenami ngenxa yokungadlali.

“Ngizwe kuthiwa akeneme ngendlela ahlawuliswe ngayo ngesenzo sakhe abona sengathi kuqiniswe kakhulu isandla.

“Kodwa ke kuzomele aqonde ukuthi izinto sezenziwa ngenye indlela manje kwiPirates ngoba akusabekezelelwa ukuganga,” kuqhuba lo mthombo.

Uphinde waveza ukuthi kungenzeka ukuthi sekuseduze abuyele eqenjini uMhango ngoba abaqeqeshi sebeke bakhuluma naye.

“ABaqeqeshi sebeke bakhuluma naye, yena kumele aqine nje bese eqhubeka nokuzikhandla ejimini ngoba ngathi akusekude abuyele eqenjini eliqala imidlalo.”

EMAIL: Editor@impempe.com  | TWITTER: @impempe_com

Leave a Reply

Your email address will not be published.