USerero uveze isifiso sokuhlangana nezikaPitso kwiClub World Cup

USerero uveze isifiso sokuhlangana nezikaPitso kwiClub World Cup
UThulani Serero
OkaDonga Gumbi

UThulani “Cream” Serero useveze isifiso sakhe sokuthi i-Al Jazira agijima kuyo igadulisane ne-Al Ahly kaPitso Mosimane kwiFifa Club World Cup e-Abu Dhabi.

Lo mqhudelwano udlalwa amaqembu awine izicoco zeChampions League emazwenikazi ngokwehlukana kwawo.

I-Al Jazira kaSerero yona ingene ngopotsho wokuthi yiyo ezobe ingosokhaya kulo mqhudelwano kulokhu. Uqala ngoLwesine.

“Sawubona mqeqeshi uMosimane, ngiyakwemukela lapha e-Abu Dhabi. Ngikufisela konke okuhle kwiClub World Cup futhi ngethemba ukuthi ngizohlangana nawe kowamanqamu,” kusho uSerero.

Lo mlayezo kaSerero udluliselwe kuMosimane yi-Al Jazira kwiTwitter. Naye uMosimane uphendulile ngomlayezo omfishane kodwa omnandi.

“Sawubona mfana wami, Inshallah (okusho ukuthi uma u-Allah evumile ngolimi lwase-Egypt),” kuphendula lo mqeqeshi. 

FUNDA NALA: ICity iqinise ngowaseVenezuela ngemuva kokudedela uLakay

USerero noMosimane bake basebenza ndawonye phambilini kwiBafana Bafana kanti kuthiwa banobudlewano obuhle impela.

Iqembu likaSerero lizowuqala ngoLwesine lo mqhudelwano ngokudlala umdlalo wokuhlunga ne-AS Pirae yaseTahiti. 

Uma likwazile ukudlula lapha, liyobe selidlulela esigabeni esilandelayo la liyobhekana khona nompetha base-Asia i-Al Hilal yaseSaudi Arabia ngeSonto. 

EzikaMosimane zona ziwuqala ngoMgqibelo lo mqhudelwano ngokuthi zibhekane neCF Monterrey yaseMexico engompetha basenyakatho yeMelika.

editor@impempe.com

Leave a Reply

Your email address will not be published.