Umdlali weChiefs osemncane akasafuni ukudlala ibhola
SIHLE NGUBO
Sekuhlale obala ukuthi kungani iKaizer Chiefs ikhethe ukubolekwa uFaiz Abrahams kule sizini ka-2026/2027, kunokuthi isayinise lo mdlali ngokuphelele.
U-Abrahams, oneminyaka engu-21, ubolekiswe yiStellenbosch FC kuMakhosi, kuze kuphele isizini eqhubekayo yeBetway Premiership.
Lo mdlali, oyibamba ophondweni, alingatshazwa nakancane ikhono lakhe kunobhutshuzwayo.
Nokho kuvela ukuthi unenkinga esike yamqhatha namaqembu aseke waba semabhukwini awo phambilini.
Kubikwa ukuthi u-Abrahams wenqabile ukubuyela eGauteng ukuyolungiselela umdlalo iChiefs ezowudlala neMamelodi Sundowns kwiCarling Knockout Cup.
Abadlali bebenikwe ikhefu elincane njengoba kunemidlalo engaphansi kwekhalenda leFIFA.
Ngokubika kweFARPost, u-Abrahams useveze ukuthi akasenalo nhlobo uthando lokudlala ibhola.
Kuvela ukuthi akaqali ukwenza lokhu njengoba eke wanyamalala kade ebolekiswe eqenjini lase-Israel, iHapoel Kfar Saba, eligcine liyinqamulile inkontileka yakhe, ekuqaleni kuka-2026.
U-Abrahams uphinde wangaziwa ukuthi ukuphi ngasekupheleni kwesizini edlule, okuphoqe umqeqeshi weStellenbosch, uGavin Hunt, ukuthi aqale ukulungiselela isizini esikuyona ngaphandle kwakhe.
Lo mdlali, okhulele kwiCape Town Spurs, uphinde wenqaba ukuya kwiDurban City, washiya abaphathi bakhe benkemile esikhumulweni sezindiza.
Nokho ngemuva kwamasonto ambalwa enze lokho iChiefs imsayinisile, yathi izomboleka kwiStellies kuze kube sekupheleni kwesizini.
Njengamanje bonke abadlali beChiefs sebesekhempini ukulungiselela umdlalo olandelayo, kodwa u-Abrahams akabonwa nangokhalo.
Lokhu kuziphatha cisho yikona okwenze ukuthi iChiefs ingamsayinisi inkontileka yanomphelo, ngesikhathi esuka kwiStellies.
Okwamanje ayaziwa inkinga ebhekene no-Abrahams kodwa kuyasolisa ukuthi udinga usizo ngokomqondo.
Amathuba amehlelayo yinto abaphupha ngayo ontanga yakhe, kodwa kuyavela ukuthi usekusho izikhawu ezimbalwa ukuthi akasenalo uthando lukanobhutshuzwayo.
IChiefs inelungelo lokunqamula inkontileka yakhe njengoba kwenze iqembu lase-Israel.
Kungekudala iChiefs ihlukane noThabo Cele ngemuva kokuthi ephule imithetho yeqembu, wadlala imidlalo yaseKasi.
Konke kulele kwiChiefs ukuthi iyayinqamula yini inkontileka ka-Abrahams noma imtholela usizo.
