Usegcine efikile eqenjini lakhe elisha uSiyabonga Ngezana
Sbongs Gumbi
USiyabonga Ngezana wethulwe kozakwabo abasha kwiFCSB ngeSonto kulandela ukubajoyina ekhempini eNetherlands.
Lo mdlali usayinwe yiFCSB yaseRomania kwiKaizer Chiefs ngenyanga edlule. Leli qembu likhempe eNethelands la lilungiselela khona isizini entsha.
Kuke kwavela ukuthi abaphathi baleli qembu bakhathazenile njengoba uSiyabonga Ngezana ebenenkinga yokuthola amaphepha amvumela ukuphuma kuleli.
Impempe ibike ngoLwesine ukuthi iFC SB ikhala ngookubambezeleka kwalo mdlali wasemuva ekutheni afike kulo.
“Inkinga yethu enkulu njengamanje ukuletha uSiyabonga (Ngezana) lapha. Kunezinkinga ezikhona mayelana neVisa.
“Esikuthole namuhla nje akuzona neze izindaba ezinhle kodwa ngithemba ukuthi sizokuthola ukuzwana kahle nabaphethe,” kusho umqondisi weFCSB uMihia Stocia kwabe-Unplayable.
“Ungumdlali webhola futhi isizini iyaqala esikhathini esingaphansi kwenyanga. Kumele okungasenani azame ukwazana nabanye ozakwabo.”
Nokho ngeSonto leli qembu likhiphe isitatimende selamukela uSiyabonga Ngezana, liveza nokuthi uzoqhibeka nenombolo yejezi abeyisebenzisa kwiChiefs.
“Lo mdlali oneminyaka engu-25, ozogqoka unombolo-30, usefikile ekhempini yeRed-Blue eNetherlands.
“Uzoqala ukuzilolonga nozakwabo abasha,” ifundeka kanjalo ingxenye yesitatimende seqembu.
“Iqembu lethu liyamamukela futhi sengathi angaba nempumelelo eminingi uma esegqoke imibala yethu obomvu noluhlaza.”
Khonamanjalo, kuvela ukuthi leli qembu bese libuyile eNaturena lizofuna u-Ashely Du Preez kodwa lachithwa.
FUNDA NALA: Isayina isihlabani seSundowns iMarumo Gallants
Isizathu esenze iChiefs inqabe wukuthi ivele iyashoda ngabahadli njengoba kungacaci ukuthi izogciina imtholile yini uRanga Chivaviro.
Lo mgadli obekwiMarumo Gallants usayinile kwiChiefs, kodwa neRichards Bay ithi ngowayo njengoba asayina inkontileka yesibambiso ngoJanuwari.
