UBrian Baloyi usephumele obala ‘ngomuthi’ ayevimba ngawo
Isikhwama esasihlezi sisepalini likaBrian Baloyi sasibakhathaza abaningi futhi bezitshela ukuthi siphethe ‘ungqo womuthi’.
Lesi khwanyana esimnyama wayesisebenzisa kakhulu ngesikhathi egila izimanga epalini leKaizer Chiefs.
Kwakuthi khona uma kuthiwa yiphenathi, avele agxume abuye nayo bese kukhalwa ngokuthi ulekelelwa yilento ekulesi sikhwama.
Ekhuluma noKarabo Phasha weSuperSport TV kwi-Podcast yakhe muva nje, uBrian Baloyi useveze iqiniso ngokuthi yini lesi simanga esasikulesi sikhwama.
Ngokusho kwkahe, lesi sikhwama sasihlala amagilavu, ibhodlela lamanzi nethawula lokuzisula ubuso.
Kodwa ngoba izimbangi zazisisaba lesi sikhwama, zizitshela ukuthi sinokuthile okuwumuthi, naye wayengakuphiki lokhu ukuze azisabisele.
“Ngiyakhumbula ngiqala ukusiphatha. Abantu babefuna ukwazi ukuthi kukhonani kuso,” kusho uBrian Baloyi.
“Yilokho okwenza ngiphikelele ukusiphatha ngoba ngaleso sikhathi wonje amaqembu ayesebenzisa umuthi, ngisho iWits.
“Lokhu kwakwenza izimbangi zizikhathaze ngokuthi kukhonani kulesi sikhwama (bese zithikamezeka).”
Lesi sikhwama sikaBrian Baloyi saduma kakhulu ngesikhathi esiza iChiefs ukunqoba iRothmans Cup iminyaka emibili kulandelana ngo-1998 no-1999.
“Ngasheshe ngakufunda ukuthi ebholeni elikhokhelayo kusebenza umqondo kunayo yonke enye into.
“Ngakho udinga into ezokwenza ube sesimweni esingcono kunezimbangi ngokwesimo somqondo,” kuchaza le nsizwa eke yavimba nakwiMamelodi Sundowns.
“Uma kuyiwa kumaphenathi, ngangidinga into ezokwenza ngiphazamise lo ozokhahlela…
“Ngakho kwathi uma ngibona ukuthi abantu iyabakhathaza le yesikhwama, ngabambelela kuyo.
“Kwakuthi uma kuzokhahlelwa amaphenathi, ubezwe bethi akumele ukhahlele ngala kunesikhwama khona.
FUNDA NALA: Ithi ‘kwagogo eZola’ imenenja yoxoshwa kuMaZulu
“Babethi uma ulikhahlela liye khona, lizophuma eceleni,” kusho uBaloyi efa yinsini.
