Ngabe uDa Cruz weChiefs angabuyisa isithunzi ngokushaya iPirates?
SIHLE NGUBO
Ukunqoba umdlalo womkhaya abazowudlala ne-Orlando Pirates, kungenza umqeqeshi weKaizer Chiefs, uFernando Da Cruz, azibuyisele ezinhliziyweni zabalandeli baMakhosi.
IChiefs izobhekana nePirates emdlalweni obhekwe ngabomvu weBetway Premiership, eFNB Stadium, eSoweto, ngoMgqibelo ngo-3.30 ntambama.
Lo mqeqeshi waseFrance usenyamanambana kubalandeli baleli qembu laseNaturena, ngenxa yokungatholi imiphumela emihle emidlalweni edlule.
KwiBetway Premiership ayikashaywa iChiefs kodwa ukudlala ngokulingana imidlalo emihlanu sekumfakele ingcindezi enkulu uDa Cruz.
Ngaphezu kwalokho iqembu liphinde laphuma kwiCAF Confederation Cup, obese kuyindebe yesibili kule sizini iChiefs iwasha ijezi.
Ekuqaleni kwesizini kusheshe kwaphela ngeChiefs kwiMTN8, ikhishwa yiLamontville Golden Arrows kuma-quarterfinal kulo mqhudelwano.
Nakanjani libuyile ithemba kubalandeli baMakhosi ngesikhathi iqembu lishaya iTS Galaxy ngo 3-0 kwiLast 16 yeCarling Knockout Cup, ngoLwesibili.
Manje uDa Cruz usebhekene nenselelo entsha yokushaya izimbangi ezindala iBucs, ukuze ajabulise abalandeli beChiefs.
Lo mqeqeshi wazi kahle ukuthi lona umdlalo osho lukhulu kubalandeli beqembu lakhe.
“Umdlalo owesekwa kunayo yonke. Kwaphela amathikithi ngemuva kwamahora ayisithupha, omunye wemidlalo ephambili e-Afrika,” kusho uDa Cruz esithangamini nabezindaba ngoLwesine.
“Uhlukanisa izwe phakathi. Yinto enhle enkulu ebholeni laseNingizimu Afrika.
“Sisebenze kahle futhi siyazethemba. Siyazi kuzoba nzima sibhekene neqembu elihle.
“Yiqembu elikhulu, kumele ngincome u-Abdes (Abdeslam Ouaddo) ngomsebenzi omuhle. Kodwa siwulungele umdlalo.”
Kuzobe kungokokuqala uDa Cruz esebhentshini emdlalweni womkhaya. Nakanjani uyazi ukuthi iChiefs ayinqobanga emidlalweni emibili edlule.
IPirates nayo ishayela phezulu kulandela ukunqoba ngo 3-0 kwiMilford FC emdlalweni weCarling Knockout Cup, ngoLwesibili.
