Usuthu lumemezele ubudlelwano ne-Amstel Lager
ZINHLE NGUBANE
AmaZulu FC ne-Amstel Lager sebehlangene ebudlelwaneni obusha obuhlose ukugubha umlando weqembu, ukuqinisa ubudlelwano balo nabalandeli, nokudala izikhathi ezingenakulibaleka emndenini wonke woSuthu.
Lokhu kumenyezelwe ngokusemthethweni emcimbini obubanjelwe e-AmaZulu Experience, eMoses Mabhida Stadium, eThekwini, ngoLwesihlanu.
Ukubambisana kuvula isahluko esisha kuzo zombili lezi zinkampani ezihlose ukuhlanganisa ezemidlalo, amasiko nemiphakathi.
AmaZulu FC, asungulwa ngo-1932, futhi angelinye lamaqembu anomlando omude ebholeni laseNingizimu Afrika, ikakhulukazi esifundazweni iKwaZulu-Natal.
Leli qembu lizakhele udumo ngenxa yothando, ukwethembeka nokuzinikela kwabalandeli balo, ezizukulwaneni ngezizukulwane.
Isiqubulo salo esithi, ‘Hebe! Usuthu,’ sesiphenduke uphawu lokuzigqaja ngobuwena beqembu, nobumbano phakathi kwabalandeli balo.
Ngalobu budlelwano, i-Amstel ihlose ukugubha lo mlando ngokudala amathuba okuthi abalandeli basondelane kakhulu neqembu.
Lokhu bazokwenza ngokusebenzisa imicimbi yezinsuku zemidlalo, izinhlelo ezigxile kubalandeli nokuxoxa ngezindaba ezithinta umlando namasiko oSuthu.
UBoipelo Malao, ophethe isigaba semikhiqizo kabhiya e-Amstel Lager, uthe lokhu kubambisana kuqhakambisa amandla ebhola okuhlanganisa abantu.
“I-Amstel ihlanganyela naMaZulu ukugubha izibopho eziqinile ezidalwa yibhola phakathi kwabantu,” kusho uMalao.
“Sikholelwa ekutheni izikhathi ezibalulekile zakhiwa ngokuxhumana kwabantu kwangempela, ukunakekelana nokuzibophezela.”
Uqhube wathi bafuna ukuhlonipha ukuzigqaja komndeni woSuthu, nokudala izikhathi ezikhethekile ezizohlanganisa abantu.
Umengameli waMaZulu, uSandile Zungu, uthe lobu budlelwano buyithuba lokulondoloza ifa lomlando weqembu, ngesikhathi kwakhiwa ikusasa eliqhakazile.
“AmaZulu angaphezu kweqembu lebhola. Sithwele umlando onokuziqhenya nomthwalo wemfanelo kubantu abazakhele futhi baleseka leli qembu, ezizukulwaneni ngezizukulwane,” kusho uZungu.
“Kwi-Amstel sithole uzakwethu owuhloniphayo lo mlando, futhi owabelana nathi ngezifiso zethu zekusasa.”
Uthe lokhu kubambisana kuzoletha ukubaluleka kwangempela kubalandeli, kuqinise ubudlelwano beqembu nemiphakathi. Kuzophinde kusize ekwakheni iqembu wonke umndeni woSuthu nesizwe, angaziqhenya ngalo.
