Right, i-Orbit iyanyuka, i-Upington iyanyuka, Umsinga usayala

Alfred Ngubane

Kuvele kwamuncu eHarry Gwala Stadium ngoLwesihlanu ntambama ngesikhathi i-Orbit College iqeda kabuhlungu iphupho leKwaZulu-Natal lokwandisa amaqembu kwiMotsepe Foundation Championship. 

I-Orbit College ne-Upington City yibo abanyukele esigabeni seChampionship besuka kwi-ABC Motsepe League. 

Lamaqembu azodlala owamanqamu womqhudelwano wokuhlunga obuseMgungundlovu esazi ukuthi ngesizini ezayo aya esigabeni esikhokhelayo. 

Umsinga bewusuthwele amathemba eKZN wokuthi izokwandisa isibalo njengoba kusele Uthongathi FC kuphela nje kulesi sigaba seChampionship. 

Kodwa ke lokho akwenzekanga njengoba ikhale ngaphansi kwi-Orbit College, ihlulwa ngo 1-0 wegoli elibe ngimkhonto ogwaze ekhaya kaThamsanqa Masondo. 

Leli qembu laseNorth West selizokwenza abe mabili awakulesiya sifundazwe adlala esigabeni seChampionship njengoba kukhona nePlatinum City Rovers. 

I-Uptington City, eqeqeshwa nguReuben Cloete owake wagijima kwi-Orlando Pirates, ingene ngokudlula kwiMpheni Home Defenders yaseLimpopo. 

Leli qembu nalo ngelesibili eNorthern Cape kulesi sigaba njengoba kukhona neHungry Lions eyangena kulesi sigaba kumasizini amabili edlule. 

FUNDA NALA: UMobara ufanisa Romain Folz nowaka odlala ngabantu

Nayo iHunrgy Lions yangena ngokuwina kule midlalo yokuhlunga kanti isayibambe kahle esigabeni esikhokhelayo.