Kusale uPercy Tau kwangena oweBucs kwiBafana

SIHLE NGUBO

Umqeqeshi weBafana Bafana, uHugo Broos, ukhala ngokuthi amaqembu ePremier Soccer League (PSL), okumele akhethe kuwona abadlali, awakayidlali imidlalo eminingi njengoba isizini ingakaqali ngokuphelele.

Usho lokhu ngesikhathi ekhuluma kwiSABC Sport ememezela iqembu lakhe elizodlala imidlalo yokuhlunga ye-Africa Cup of Nations kusukela ngesonto elizayo.

“Sibonile emdlalweni weSundowns neStellenbosch izolo. IStellenbosch ibisemdlalweni ngoba seyike yadlala imidlalo embalwa,” kusho uBroos.

“Ngakolunye uhlangothi iSundowns bekungeyona le esiyaziyo ngoba ayikayidlali imidlalo eminingi esemthethweni. KwiKaizer Chiefs bakhona abadlali kodwa abakayidlali imidlalo esemthethweni.”

ISundowns igcine ishaywe ngo 1-0 yiStellenbosch emdlalweni womlenze wokuqala wowandulela owamanqamu weMTN 8, eLucas Moripe Stadium, ngoLwesithathu. Kugqame ukuba buthuntu phambili kwamapali.

Esikwatini sikaBroos kugqame ukungena okokuqala kukanozinti we-Orlando Pirates, uSipho Chaine, nokusala ngaphandle komdlali wasesiswini we-Al Ahly, uPercy Tau. Omunye ongekho unozinti uRonwen Williams osazama ukululama ngokuphelele ekulimaleni.

Umdlali weChiefs okhona kulesi sikwati uRushwin Dortley, odlala emuva kwesokunxele. IBafana izobhekana ne-Uganda kowokuhlungela i-Afcon ngoSepthemba 6 ekhaya, bese iphinde idlale neSouth Sudan ngoSepthemba 10 ekuhambeni.

Selilonke iqembu lesizwe likaBroos limi kanje:

Onozinti: Ricardo Goss; Veli Mothwa; Sipho Chaine

Izitobha: Nyiko Mobbie; Thapelo Morena; Rushwin Dortley; Nkosinathi Sibisi; Khuliso Mudau; Fawaaz Basadien; Siyabonga Ngezana; Grant Kekana; Aubrey Modiba

Abasesiswini: Teboho Mokoena; Jayden Adams; Siphephelo Sithole; Thalente Mbatha

Amafolosi: Themba Zwane; Oswin Appollis; Patrick Maswanganyi;  Elias Mokwana; Lyle Foster; Relebohile Mofokeng; Iqraam Rayners