Usuthu ‘luchizelwe’ uMsunduzi ngeHarry Gwala Stadium
SIHLE NGUBO
Inkinga ebhekene namaqembu eBetway Premiership, yokushoda ngezinkundla zokudlalela, ibukeka izolokhu iyisimbela emaqenjini wonke amasizini.
Le nkilabayitheka ihlasele wonke amaqembu ePremiership, azithola edlalela imidlalo yasekhaya ezinkundleni ezahlukene.
Lokhu kwenza kufane nokuthi lihambile iqembu uma lidlala nelivakashile, okungalisizi kangako ekutheni linqobe imidlalo.
Muva nje iLamontville Golden Arrows idlalele umdlalo wayo wasekhaya, neKaizer Chiefs, eMbombela Stadium, nokuyinto ebanenge kakhulu abalandeli bebhola baseThekwini namaphethelo.
Amaqembu aKwaZulu-Natal amane, kumele ashintshane ngePrincess Magogo Stadium, KwaMashu, neKing Zwelithini Stadium, eMlaza.
Lawo maqembu yi-Arrows, AmaZulu FC, iRichards Bay FC, neMilford FC.
IDurban City yona ayivamisile ukuba nenkinga eChatsworth Stadium, yize kukhona ukukhononda ngesimo sale nkundla, emaqenjini asuke evakashile.
IMoses Mabhida Stadium iyalungiswa kanjalo neMhlathuze Sports Complex, okuchaza ukuthi ayikho imidlalo edlalelwa kulezi zinkundla.
I-Premier Soccer League (PSL), isanda kuhlola uMhlathuze kuleli sonto, yaphinde yayichitha le nkundla ukuthi ingasingatha imidlalo yeBetway Premiership.
Akucaci ukuthi iSugar Ray Xulu Stadium, eseClermont, ikusiphi isimo kulesi siphithiphithi. Kodwa kuyaziwa ukuthi ayiminingi imidlalo yePremiership edlalelwa kule nkundla.
Isikhulu esiphezulu saMaZulu FC, uSinenjabulo Zungu-Ntuli, sithi bake bazama ukuthola iHarry Gwala Stadium, eseMgungundlovu, ukuthi badlalele eminye imidlalo yabo yasekhaya kuyona.
Nokho kuvela ukuthi bahambe ekamabuyaze, ngemuva kwezingxoxo zabo noMasipala uMsunduzi.
“Sibe nezingxoxo ngeHarry Gwala, besifisa ukudlalela khona ngoba sinabalandeli abaningi eMgungundlovu,” kusho uZungu-Ntuli kuKhozi FC.
“Ngicabanga ukuthi njengeKwaZulu-Natal kumele siye kuzo zonke izindawo lapho sazi khona ukuthi sinabalandeli.
“Siyafisa ukudlalela eHarry Gwala Stadium kodwa izinhlelo ebesinazo nabo azizange ziphumelele.
“Kule sizini sibhalise iMoses Mabhida Stadium, iPrincess Magogo Stadium neKings Park Stadium, njengezinkundla zethu zasekhaya.”
IKings Park Stadium nayo ibuye ingatholakali uma kudlala iSharks, okuyiuona okuyinkundla yayo.
