UKatsande usevuke ngomsebenzi kwelaseMpumalanga

ICrystal Lake FC, ehlulwe yi-Orlando Pirates kwiNedbank Cup emasontweni amabili edlule, isibophele uWillard Katsande ethimbeni layo labaqeqeshi.

IPirates yalibhabhadisa ngo 6-0 leli qembu elidlala esigabeni seHollywoodbets League eMpumalanga. 

Limemezele ngoLwesine ukuthi seliqashe uKatsande kodwa alangacacisa ukuthi uzokwenza muphi umsebenzi. 

“ICrystal Lake FC yemukela owayengumdlali weKaizer Chiefs, uWillard Katsande (uSalt and Vinegar) ethimbeni labaqeqeshi,” libhale kanje iqembu kwiFacebook. 

UKatsande udlale isikhathi eside kwiChiefs kanti ungomuye wabadlali ababekhona ngesikhathi leli qembu ligcina ukunqoba izindebe. 

Kwakuyisizini ka-2014/15 ngesikhathi iChiefs isengaphansi kukaStuart Baxter igcina ukunqoba izindebe.

UKatsande uthi kungenza yeqembu ababenalo elalinabadlali bangaphandle abayaziyo into abayizele kuleli.

“Sasibusisekile ukuba nomuntu ongubaba kithi kuStuart Baxter ngoba wayeyichaza icace into ayilungele kumdlali ngamunye. 

“Uma ubheka iqembu esasinalo ngaleso sikhathi, babebaningi abangaphandle,” usho kanje ekhuluma neRadio 2000 kuleli sonto. 

“Ngenhlonipho nje, kunomehluko phakathi komdlali oqhamuka ngaphandle nowendabuko.

“Owangaphandle uyashesha ukubamba akutshelwayo bese ekwenza.

“Nangesikhathi sigcina ukunqoba ligi, kunemidlalo engu-11 esasiyinqoba ngo 1-0 futhi lokho kwakungelona iphutha. 

“Kwakuyicebo lethu ngoba sibona ukuthi ibhola selijikile futhi amabhola abekwe phansi asebaluleke kakhulu ebholeni lesiimanje.

FUNDA NALA: UNdah uphendule ngokusatshiswa ‘wumfana omncane’ uDuba

“Iningi lamagoli ethu ayeqhamuka emabholeni abekwe phansi, bese sivala thaqa emuva,” kuchaza uKatsande.