Kubhimbile kwiPirates, uRiveiro uphoxwe abanike ithuba
Ukuhlola abadlali abangajwayele ukudlala kukaJose Riveiro akuhambanga ngendlela abefisa ngayo i-Orlando Pirates ishaywa yiSekhukhune United.
ISekhukhune sinqobe lo mdlalo weDStv Premiership obusePeter Mokaba Stadium ngoMgqibelo ngo 2-1.
URiveiro ubebashiye ngaphandle bonke abadlali bakhe abajwayele ukuqala imidlalo abebehambe neBafana Bafana ngesikhathi sekhefu leFifa.
Kusheshe kwacaca ke ukuthi sikhona isikhala sikaPatrick Maswanganyi noTapelo Xoki ikakhulukazi.
Iminyakazo yePirates beyingakwazi ukuhlangana kahle, kucaca ukuthi ayikho ‘i-ambulensi yaseTembisa’ eyabonwa uReggie “Mapensela” Ndlovu.
Nesikhala sikaXoki emuva besibonakala njengoba bekungekho ukudlala ngokubambisana phakathi kuka-Olisah Ndah noThabiso Sesane.
URiveiro uvumile ekupheleni komdlalo ukuthi izinto azihambanga ngendlela.
Yize engalibekanga ngembaba, kodwa kucacile ukuthi abadlali abanike ithuba bamphoxile.
“Sidlale kahle ngemuva kwegoli. Besidlala ngokwesaba ngaphambi kwegoli,” kusho lo mqeqeshi.
“Besingekho esimweni esifanele. Singenelwe yigoli, kwajika izinto. Asidlalanga ngendlela yokuthi besingawina.
“Kodwa ngasekupheleni komdlalo sizamile, sibe namathuba amaningi.
“Igama alibalulekile enkundleni, ukuzinikela komdlali okubalulekile.
“Namuhla sibanike isikhathi esiningi sokuthi bakhululeke ngendlela abebedlala ngayo, yingakho siphume sishwiba izandla.
Yize iPirates beyidlala kahle futhi kuyiyo ebiphethe umdlalo esiwombeni sokuqala, kube yiSekhukhune elithola kuqala igoli.
UVusumuzi Mncube ushayelwe enhle iphasi uLinda Mntambo bengaphakathi ebhokisini lePirates.
Lo mdlali akazange esalenza iphutha, walinamathisela enethini. IPirates beyibheke ukubuya ekhefini yenze kangcono.
Kodwa kube uLinda Mntambo – obeyiphela endlebeni kwiPirates – ovule igebe leSekhukhune eshaya igoli lesibili.
IPirates igcine ilitholile elokubika ekhaya eSoweto eliqhamuke ngonyawo lukaTshegofatso Mabasa.
FUNDA NALA: ‘Sishode ngegoli,’ kusho uJohnson iChiefs ibambana neCity
Lo mphumela wehlisele iPirates endaweni yesine kwilogi, yeqiwa yiyo iSekhukhune neStellenbosch eshaye iRoyal AM ngawo uMgqibelo emini.
