UJansen ugile iSri Lanka kwiTest yokuqala eThekwini 

SIHLE NGUBO 

UMarco Jansen ubeke amaProteas endaweni enhle ethatha amawikhethi ayisikhombisa iNingizimu Afrika ihlaza iSri Lanka eKingsmead Stadium, eThekwini, kwiTest yokuqala.

I-Sri Lanka iphume yonke inama-run angu-42 kuma-over angu-13.5 kwi-innings yokuqala. Lokhu bekuchaza ukuthi ilandela emuva ngama-run angu-149. 

Phambilini iNingizimu Afrika iphume yonke seyenze ama-run angu-191 kwi-innings yayo yokuqala. ISri Lanka iyona ewine ithosi yakhetha ukushwiba ngoLwesithathu, obekuwusuku lokuqala.

Bekungathi yenze umsebenzi oncomekayo osukwini lokuqala ngesikhathi ikhipha amaProteas ena-191. Bekubhoke uKumara noFernando abathathe amawikhethi amathathu emunye. 

I-Sri Lanka iphule irekhodi leBangladesh eKingsmead Stadium, lokuphuma isenze ama-run angu-53 kuphela ngesikhathi ibhekene neNingizimu Afrika.

Iphendula iNingizimu Afrika ifike yengeza ku-149 ebihamba phambili ngawo. U-Aiden Markram uphume esenama-run angu-47.

UJayasuriya uthathe amawikhethi nge-innings yesibili yeNingizimu Afrika. Lokhu kwenze wahlanganisa amawikhethi angu-100 emidlalweni yeTest.

AmaProteas avale usuku ena-132/3 kanti bekubhetha ukaputeni uTemba Bavuma (24*) noTristan Stubbs (17*). UBavuma ubhethe kahle kwi-innings yokuqala ehlanganisa ama-run angu-70.

INingizimu Afrika izoya osukwini lwesithathu ihambela phezulu njengoba ihamba phambili ngama-run angu-281. Inethuba elihle lokunqoba umdlalo.