OweDowns ufongqa isingqoko kubalandeli baMasandawana
SIHLE NGUBO
Uncenga abalandeli ukuthi bangabahlamuki kulesi sikhathi esinzima, uGrant Kekana odlala emuva kwiMamelodi Sundowns.
Izinto zithanda ukungahambi kahle kompetha beligi njengoba besanda kuqunjwa phansi omakoti bePremiership, iMagesi FC, ngo 2-1 emdlalweni wamanqamu weCarling Knockout ka-2024 ngempelasonto edlule.
Kuphinde kwangahamba kahle kuBafana Ba’Style kulandela ukubanjwa ngo 0-0 yi- AS Maniema Union yaseDemocratic Republic of Congo emdlalweni wokuvula wamaqoqo weCaf Champions League, eLoftus Stadium, ePitoli ngoLwesibili.
Yomibili le midlalo bekulindeleke ukuthi iyinqobe iSundowns uma kubhekwa amaqembu ebibhekene nawo, nokuthi yona ishaya ngobisi lwesikwati.
IMagesi yiqembu elidlala okokuqala kwiPremiership kule sizini, ngakho bekungalindeleka ukuthi iSundowns izidlele amahlanga kulona.
Ngakolunye uhlangothi iManiema Union iyaqala ngqa ukufinyelela kweyamaqoqo kwiChampions League, ngaleyo ndlela bekubhekeke ukuthi Abafana Ba’Style baqoqe amaphuzu aphelele kuyona bedlalela ekhaya.
ISundowns izobhekana neSekhukhune United emdlalweni weBetway Premiership eLoftus Stadium, ePitoli, ngoMgqibelo ngo-8 ebusuku. ISekhukhune nayo ibuya esibhaxwini sika 3-1 esithole kwiTS Galaxy ngoLwesithathu.
“Bekuyisonto elinzima, nakanjani sidumele ngomphumela womdlalo wamanqamu esiwudlale neMagesi FC,” kusho uKekana.
“Siphinde sahluleka ukunqoba emdlalweni wethu weChampions League. Siyazama ukuvuka sizithathe, siyazi ukuthi isizini iseyinde.
“Ngeke sisakhalela ubisi oluchithekile manje, sidinga ukulungisa lapho kufanele khona bese siphinde sinqobe imidlalo futhi.”
ISundowns isendaweni yesibili kwilogi yePremieship ngamaphuzu angu-18. Ukunqoba kwiSekhukhune ngoMgqibelo kungayenza ilingane ne-Orlando Pirates ezihola phambili ngamaphuzu angu-21.
“Esikwenzayo njengabadlali ukuzinuka thina amakhwapha. Sinikwe umsebenzi wokuthola imiphumela emihle,” kuqhuba lo mdlali weBafana Bafana.
“Nakanjani uma amaqembu ezodlala nathi afika enomfutho. Siyazi ukuthi bashayiwe yiTS Galaxy emdlalweni wabo.
“Kodwa siyazi ukuthi banesikwati esihle, abadlali abahle nomqeqeshi omuhle ngokunjalo. Okwethu ukuthi sizilungiselele kahle bese sizame ukuthola imiphumela omuhle.
“Sidinga abalandeli ukuthi babe nathi ngoba sibhekene nesikhathi esinzima njengamanje. Yinto eyenzekayo lena akuhlale kuhamba kahle zonke izinsuku.
“Siyabonga kakhulu ukuseseka kwabo. Sihlale sibezwa becula beshaya izigubhu…sicela baqhubeke nokuza (enkundleni) izinto zizoshintsha kuphinde kube mnandi.”
