Usuthu lusayinise umgadli onamava ukuqinisa iqembu
SIHLE NGUBO
AmaZulu FC aqinise iqembu ngokusayinisa umgadli onamava weBafana Bafana, uThabiso Kutumela, angangatshazwa amava akhe.
UKutumela, oke wadlalela iMamelodi Sundowns ne-Orlando Pirates, ubeseqenjini lesizwe iBafana Bafana, ebelidlala imidlalo ye-African Nations Championship eKenya.
Usuthu luveze ukuthi lo mgadli uyena osezogqoka ijezi unombolo 10, ohlonishwa kakhulu kunobhutshuzwayo.
Umengameli weqembu, uSandile Zungu, uzwakalise ukwesasa kakhulu emukela uKutumela.
“Sijabula kakhulu ukwemukela uThabiso Kutumela eqenjini. Ungumgadli ophelele,” kusho uZungu esitatimendeni soSuthu.
“Ngesikhathi esekwiMaritzburg United ubebangisana nabadlali abafana noBradley Grobbelaar noPeter Shalulile ekutholeni umklomelo womgadli ovelele.
“Bobabili laba badlali (uGrobbelaar noShalulile) basaqhubeka nokwenza lokho emaqenjini abo ngokwehlukana.
“Sithemba ukuthi uKutumela uzosheshe azibonakalise eqenjini. Simamukela ngezandla ezifudumele.”
UKutumela, oneminyaka engu-32, uzobe esedlalela iqembu lesithathu laKwaZulu-Natal.
Ngaphandle kwiMaritzburg United, ugcine esemabhukwini eRichards Bay FC ngesizini edlule.
Lo mgadli uthe kuyinto enkulu kuyena ukujoyina Usuthu oluqeqeshwa u-Arthur Zwane.
“Ngiyajabula ukuthi lokhu kugcine kwenzekile. Akukona okokuqala AmaZulu ekhombisa ukungifuna,” kusho uKutumela.
“Ngiyakhumbula ngesikhathi ngikwiMaritzburg United, babuza ngami.
“Ngebhadi akwenzekanga ngaleso sikhathi kodwa ngiyathokoza ukuthi kuhlanganile manje.
“Inhloso yami enkulu ukusiza iqembu ukuthi linqobe izindebe nokuthi liqede endaweni engcono kunesizini edlule kwilogi.
“Ebholeni kwenzeka noma yini. Iqembu ngalinye linezinhloso zalo, okwami ukulisiza ukuthi lizifeze.”
