UMaharaj iphinde washaya into ecokeme amaProteas ebhaxabula i-England
SIHLE NGUBO
UKeshav Maharaj ukhombisile ukuthi kungani engumshwibi ohamba phambili emhlabeni emidlalweni yosuku olulodwa, ngesikhathi iNingizimu Afrika ishaya i-England ngamawikhethi ayisikhombisa emdlalweni wokuqala, eHeadingley Cricket Ground, eLeeds, ngoLwebisili.
Lona bekungumdlalo wokuqala wosuku olulodwa kwemithathu ezodlalwa yila mazwe e-England.
INingizimu Afrika iyona ewine ithosi yakhetha ukushwiba kuqala kulo mdlalo.
Abashwibi bamaProteas abakwenzanga kwaba lula ukubhetha eqenjini lasekhaya ebelilokhu lilahla amawikhethi.
I-England iphume yonke isenze ama-run angu-131 kuma-over angu-24.3 nokuyinto ebingalindelekile kulo mdlalo.
UMaharaj uthathe amawikhethi amane kwi-innings yokuqala, kwathi uWiaan Mulder wathatha amathathu.
Ngasohlangothini lwamaNgisi kudlale kahle uJamie Smith ophume esehlanganise ama-run angu-54
AmaProteas abedinga ama-run angu-132 kuphela kuma-over angu-50 ukuze anqobe umdlalo wokuqala wosuku olulodwa.
INingizimu beyiye kulo mdlalo ingakaze inqobe emidlalweni emihlanu yosuku olulodwa uma ibhekene ne-England eLeeds.
EzikaTemba Bavuma zisheshe zacacisa ukuthi zifuna ukuwuqeda umdlalo, kubhoke u-Aiden Markram obelishaya ngokukhululeka ibhola.
UMarkram, oyiphini likakaputeni uBavuma ugcine ephume esehlanganise ama-run angu-86 (55), kwathi uRyan Rickelton wenza anga-31.
URashid uthathe amawikhethi amathathu kodwa lokho bekungenele ukuvimba amaProteas ukuthi anqobe.
Ukunqoba kwamaProteas kwenza ahambe phambili ngo 1-0 kulolu chungechunge lwemidlalo emithathu.
Umdlalo wesibili ungoLwesine kanti ukunqoba lapho kwamaProteas kuyosho ukwemuka nalo uchungechunge.
INingizimu Afrika isanda kushaya i-Australia ngo 2-1 ochungechungeni lwemidlalo yosuku olulodwa emithathu, ngenyanga edlule.
Emdlalweni wokuqala uMaharaj wathatha amawikhethi amahlanu, amaProteas eshaya i-Australia.
