IChiefs nePirates bazohlasela eCongo emidlalweni yeCAF
SIHLE NGUBO
Ngemuva kwekhefu leFifa iKaizer Chiefs izolibangisa eDemocratic Republic of the Congo (DRC) ukuyobhekana ne-AS Simba, emdlalweni womlenze wokuqala weCAF Confederation Cup, emzuliswaneni wesibili, eTP Mazembe Stadium, eLubumbashi, ngoMgqibelo ngo-3 ntambama.
Amakhosi azobhekana nompetha beDRC Cup enkundleni yeqembu elaziwayo, iTP Mazembe, eLubumbashi.
Kuzobe kungokwesibili iChiefs ibhekana neqembu laseDRC emdlalweni othinta umqhudelwano wase-Afrika.
Amakhosi ake atholana phezulu ne-AS Vita emdlalweni womzuliswani wesibili weCAF Champions League ngo-2014.
IChiefs yashaywa ngo 3-0 emlenzeni wokuqala nokwenza ukuthi iwashe ijezi kowesibili yize yanqoba ngo 2-0.
Lona kuzobe kungumdlalo wokuqala weChiefs eLubumbashi, njengoba umdlalo eyawudlala ne-AS Vita wawuseKinshasa.
Umgadli weChiefs, uGlody Lilepo, odabuka eDRC, uzobe evakashele ngakubo ukuyobhekana ne-AS Simba, aseke wabhekana nayo esadlalela i-AS Vita.
ULilepo uyena oshaye igoli ngesikhathi iChiefs ibhekene neKabuscorp yase-Angola emlenzeni wesibili ophele ngo 1-1 sekuhlanganiswe amagoli emilenze emibili. IChiefs inqobe ngo 5-4 sekukhahlelwa amaphenathi eFNB Stadium.
IChiefs izozama ukunqoba umlenze wokuqala eLubumbashi ukuze ibuyele ekhaya izoqedela umsebenzi eDobsonville Stadium, ngo-Okthoba 26.
I-AS Simba izoba yiqembu lesine laseDRC ukubhekana neChiefs. Ngaphandle kwe-AS Vita, iChiefs seyike yabhekana neSt Eloi Lupopo kanjalo neTP Mazembe emidlalweni yobungani.
Kule mpelasonto kuzoqopheka umlando ukuthi izinkunzi zaseSoweto, iChiefs ne-Orlando Pirates, bazodlala edolobheni elifanayo, ngaphandle kwaseNingizimu Afrika emiqhudelwaneni yase-Afrika, izinsuku zilandelana.
IPirates izobhekana neSt Eloi Lupopo, eStade Frederic Kibassa Maliba, eDRC, emdlalweni weCAF Champions League, ngeSonto.
EZimnyama zishaye iLioli yaseLesotho ngo 7-0 sekuhlanganiswe amagoli emilenze emibili, emzuliswaneni wokuqala weCAF Champions League.
IPirates izoya kulo mdlalo inokuzethemba okukhulu, kulandela ukuthi abadlali bayo benze kahle kwiBafana Bafana emidlalweni yokuhlungela iNdebe yoMhlaba.
U-Oswin Appollis, u-Evidence Makgopa noThalente Mbatha, bashaye amagoli iBafana Bafana ibhaxabula iRwanda ngo 3-0, eMbombela Stadium, ngoLwesibili.