UGayton McKenzie angase aqhathe iSafa neFifa ngokungenelela kolukaMokoena
SIHLE NGUBO
Ungqongqoshe weZemidlalo kuzwelonke, uGayton McKenzie, ufuna iSafa imthumelele umbiko ogcwele mayelana nokuthathelwa kweBafana Bafana amaphuzu amathathu yiFifa, kulandela ukudlalisa uTeboho Mokoena kungafanele.
Iqembu lesizwe lakuleli liqede imidlalo yokuhlungela iNdebe yoMhlaba sekubanjwe umoya, kulandela ukuphucwa amaphuzu amathathu yiFifa.
IBafana Bafana idlalise uMokoena, weMamelodi Sundowns, enamakhadi aphuzi amabili, ngesikhathi ibhekene neLesotho ngoMashi nonyaka.
Kusuke ukudideka nokumangala kubathandi bebhola eNingizimu Afrika, sekuvela ukuthi lo mdlali oyibamba esiswini, kwakungamele adlale kulo mdlalo.
Ngaphambi kokuthi iBafana Bafana ibhekane neZimbabwe ngeledlule, iFifa iwathathile amaphuzu amathathu kwiBafana Bafana, yaphinde yanquma ukuthi iqembu lesizwe lakuleli lashaywa ngo 3-0 ngesikhathi libhekene neLesotho, kulo mdlalo elawunqoba ngo 2-0.
ISafa igcine iludlulisele phambili lolu daba ekomitini elibhekene nokudluliswa kwamacala leFifa.
IBafana Bafana igcine izibekisele indawo kwiNdebe yoMhlaba nokuchaza ukuthi izoyibamba e-USA, eMexico naseCanada ngonyaka ozayo.
Ngesikhathi ekhuluma neSABC umengameli weSafa, uDanny Jordan, uthe asisekho isidingo sokunaka indaba kaMokoena manje ngoba iqembu seliya kwiNdebe yoMhlaba.
“Yinto engemuva leyo manje, sesibheke phambili kwiNdebe yoMhlaba ezayo,” kusho uJordan.
“Ngicabanga ukuthi nomqeqeshi ukutshelile sibheke phambili manje, silungiselela i-Afcon neNdebe yoMhlaba.
“Simatasa kakhulu nje silungiselela neqembu lesizwe lika-Under 17 ukuthi liye kwiNdebe yoMhlaba.”
Nokho uMcKenzie ukhiphe isitatimende ethi iSafa kumele ichaze ukuthi kwenzekani kulolu daba.
“Ngiyasibona isitatimende sakamuva esifike kimina sivela kumengameli weSafa, ukuthi lolu daba sekuphelile ngalo, futhi inhlangano seyinqume ukuqhubekela phambili, ingalokhu ikhuluma ngalo,” kusho isitatimende esivela ehhovisi likaMcKenzie.
“Nokho kubalulekile ukuthi sicacise siphinde senze ubulungiswa kubantu abathanda iqembu lesizwe nendlela elidlala ngayo.
“Abalandeli kumele baqinisekiswe ukuthi izinyathelo ezifanele zithathiwe, nokuthi labo abathintekayo baphumele obala kwabhekwana nabo, ukuze lokhu okwenzekile kungaphinde kwenzeke.
“Lesi sigameko sibe sibi ebholeni laseNingizimu Afrika emhlabeni, futhi sidicilele phansi umsebenzi wabadlali, abaqeqeshi nabalandeli.”
Okushiwo uMcKenzie kuyiqiniso kodwa lokhu kungaphinde kuqhathe iSafa neFifa futhi.
Kuyaziwa ukuthi iFifa ayifuni ukuthi uhulumeni ugxambukele ezintweni ezithinta ibhola kuwo wonke amazwe.
UMcKenzie unike iSafa izinsuku eyisikhombisa ukuthi imnike umbiko ogcwele mayelana nalolu daba lwamakhadi aphuzi.
Lo ngqongqoshe uphinde wabhalela iFifa incwadi exolisa ngalokhu okwenzekile kwiBafana Bafana emidlalweni yokuhlungela iNdebe yoMhlaba.
