Umdlali weChiefs ophuke ingalo ngeke esadlala kule sizini
SIHLE NGUBO
Umdlali wasesiswini weKaizer Chiefs, uMduduzi Shabalala, bekulindeleke ahlinzwe ngoLwesine kulandela ukuphuka ingalo emdlalweni weBetway Premiership bebhekene neMamelodi Sundowns ePitoli, ngoLwesithathu ebusuku.
UShabalala uphume esethwelwe ngohlaka kulandela ukudlaliswa kabi ngasekupheleni kwesiwombe sokuqala, waphuthunyiswa esibhedlela.
Kuvele ukuthi uchachambe ithambo (humerus) eliphakathi kwegxalaba nendololwane.
Kulindeleke ukuthi elulame ngokuphelele emasontweni amahlanu kuya kwayisithupha, nokuchaza ukuthi ngeke ayidlale imidlalo emithathu esele kule sizini.
Kwenzeka lokhu nje uWandile Duba usazama ukululama ekudonsekeni umsipha, okwenze wangadlala bebhekene neSundowns.
Ngokubika kweChiefs kwi-website yayo, ithimba lodokotela lisebenza kanzima ukuqinisekisa ukuthi uyalulama, abuyele enkundleni ngokushesha.
Amakhosi azobhekana neSekhukhune United emdlalweni weBetway Premiership, ePeter Mokaba Stadium, ngeSonto ngo-5.30 ntambama.
Ngemuva kwalokho iChiefs izolibangisa eThekwini lapho izotholana phezulu naMaZulu FC, eMoses Mabhida Stadium, ngoMeyi 16.
IChiefs izovala isizini ngokubhekana neChippa United ngoMeyi 23.
IChilli Boys isanda kuchitha obengumqeqeshi uVusumuzi “Kanu” Vilakazi kulandela ukuphikwa yimiphumela yakamuva.
Lo mqeqeshi emasontweni amabili edlule ubhaxabulwe AmaZulu FC ngo 5-1, kwathi ngoLwesithathu wehlulwa iSekhukhune ngo 3-1.
UKanu ungumqeqeshi wesihlanu oxoshwa yileli qembu kule sizini. Abanye asebeke bacija iChilli Boys uMorgan Mammila, uLucy Eymael, uMusa Nyatama noSinethemba Badela.
