Akuvotwe ngobuningi kowoMdlali oVelele kwiCarling Knockout
Kunxuswa abalandeli ukuthi bavotele umdlali ababona kuwuyena osuke edlale kahle, bengahambisi ngokothando lwalowo mdlali emidlalweni yeCarling Knockout Cup.
Lona ngumlayezo okhishwe nguCandice van den Bosch, oyiMarketing Manager yeCarling Black Label.
Ukhuluma kanjena nje uVan den Bosch kuvele ukungeneliseki ngomklomelo woMdlali oVelele otholwe abanye emidlalweni yomzuliswano wokuqala kwiCarling Knockout emasontweni edlule.
Nokho into ekhulumayo amavoti abalandeli abawafaka umdlalo usaqhubeka.
“Siyabagqugquzela abalandeli ukuthi uma bebona ukuthi umdlali othile udlale kahle bavote ngobuningi.
“Konke kusezandleni zabo futhi kuvotwa mahhala,” kusho uVan den Bosch.
Uthe bajabule kakhulu ngokuthi abalandeli balwamukele uhlelo lwabo abeze nalo kulo mqhudelwano, futhi izinombolo ziyazikhulumela.
“Sijabule kakhulu futhi simangele ngendlela abalandeli abenza ngayo.
“Kusukela kuFak’ igoli uzobona, kuya ekuvoteleni uMdlali oVelele, izinombolo zinhle kakhulu.
“Njengamanje sikhuluma ngokuthi bangaphezulu kuka-500 000 asebezimbandakanye ekuvoteni.
“Lokhu kusijabulisa kakhulu futhi kwenza nokuthi amagoli ashaywe ngokushesha.”
Ukuvotela igoli nesikhathi elizongena ngaso ushaya u *120*660# bese uzibeka ethubeni lokukhala wemuke no-R90 000 (kuncike ekutheni igoli lingene ngamuphi umzuzu).
NgoLwesihlanu ebusuku kuzobe kungekho okuhlukile uma sekuqala imidlalo yomzuliswano wesibili kwiCarling Knockout.
IPolokwane City izokwamukela iStellenbosch FC e-Old Peter Mokaba Stadium, ePolokwane, eLimpopo. Lo mdlalo uzoqala ngo-7.30 kusihlwa.
Izoqhubeka ngoMgqibelo le midlalo la eMoses Mabhida Stadium, eThekwini kuzoba nemidlalo emibili ngosuku olulodwa.
Kuzoqala iRichards Bay FC ne-Orlando Pirates, ngo-3 ntambama, bese kulandele AmaZulu FC neLamontville Golden Arrows, ngo-7 ntambama.
Kungokokuqala emlandweni wePremier Soccer League (PSL), ukuthi kudlalwe imidlalo emibili emikhulu enkundleni eyodwa, ngosoku olufanayo.
“Abalandeli abeze ngobuningi babo ngoba silindele injabulo yodwa eMoses Mabhida Stadium. Kuningi okuyizipho esizonikezela ngakho ngesikhathi kungadlalwa kanti bakhona nabazobe benandisa,” kusho uVan den Bosch.
“Ngaphandle kwalokho silindele imidlalo emihle nasenkundleni. Ithikithi liwu-R80 kuphela ukuze ubuke imidlalo yomibili. Akukho okungadlula lokhu kuyimpelasonto eThekwini.”
Amaqembu azodlala kweyandulela owamanqamu azoqhathwa ngoMsombuluko. Le midlalo izodlwala ekuqaleni kukaDisemba kanti owamanqamu ungoDisemba 16.
FUNDA NALA: Kushone umdlali weqembu elizodlala neSundowns
Umdlalo wokugcina walesi sigaba uzoba sePeter Mokaba Stadium ngoMgqibelo ngo-8 ebusuku phakathi kweSekhukhune United neTS Galaxy.
