IRichards Bay seyimtholile umqeqeshi, owakuleli
Alfred Ngubane
Umkhankaso wokuthungatha umqeqeshi kwiRichards Bay sewufike ekugcineni njengoba seyimtholile kanti kuthiwa owakuleli.
Leli qembu ligejiswe yiRaja Casablanca yaseMorocco kuJosef Zinnbauer waseGermany oke wacija i-Orlando Pirates kuleli phambilini.
Kuvela ukuthi kwase kusele kuvunyelwane ngokuthile bese eyasayina lo mqeqeshi ngesikhathi kuqhamuka iRaja imgixabeza ngezizumbuli zemali.
Nokho akuyithathanga ke isikhathi eside ukuthi ithole omunye njengoba umthombo weMpempe uthi usekhona, sekulindwe afike azosayina.
“Umqeqeshi usetholakele futhi ngowakuleli. Yilokho kuphela engingakutshela khona okwamanje,” usho kanje lo mthombo.
Impempe ibe seyifokisa nakwabanye yaze yathola ngabasondelene nomqeqeshi weBafana Bafana obambile, uMorena Ramoreboli ukuthi ngiye ozobe ecija iNatal Rich Boys ngesizini ezayo.
“Kungenzeka kube nguye ngoba yena uyasho ukuthi alaphindeli eBotswana ngesizini ezayo. Uthi ufuna inselelo entsha nokukhula kulo msebenzi wabo,” kusho umthombo osondelene nemenenja yakhe.
URamoreboli ubambe kwiBafana njengamanje njengoba izodlala kwiCosafa Cup. Lokhu kwenzeke ngenxa yokuthi uHelman Mkhalele, oyiphini likaHugo Broos nokunguye okumele ahlale ebhentshini emiqhudelwaneni efana nalona, akanazo izimpepha ezifanele.
Bekuvele ke kodwa sike sabika ukuthi uRamoreboli ungomunye wabaqeqeshi abafakelwe izicelo zomsebenzi kwiRichards Bay.
Imenenja yakhe ayitholakalanga ocingweni ukuze icacise ngalokhu. Isikhulu seNatal Rich Boys, uJames Dlamini uke washo Okhozini FM kuleki viki ukuthi basele namagama amabili abazokhipha kuwo umqeqeshi wabo omusha.
FUNDA NALA: Elaphesheya lilinga iPirates ngoMonnapule Saleng
Impempe ithole ukuthi laba bekungoMandla Ncikazi noRampreboli. UNcikazi kuthiwa ucele ukungawemukeli okwamanje lo msebenzi ngoba esafuna ukuncela ulwazi kuJose Riveiro ayiphini lakhe kwi-Orlando Pirates njengamanje.
