Ikhefu libe lihle kwiPirates, kwelulame abebelimele
I-Orlando Pirates ithi ikhefu lemidlalo yokuhlungela iNdebe yoMhlaba libe wusizo olukhulu kuyo njengoba sekweluleme abadlali abebelimele.
Kubadlali abebelimele futhi bengabonakali emidlalweni edlule yePirates kukhona ukaputeni u-Innocent Maela noKabelo Dlamini.
“Ukwenuka kwesibalo semidlalo kube nomthelela ongemuhle eqenjini, kwadala ukulimala kwabadlali abambalwa,” isho kanje esitatimendeni iPirates.
“Lezi zinsuku ezingu-12 ezilethwe yikhefu bezidingeka kakhulu ukunika abadlali isikhathi sokwelulama kahle.”
IPirates ithe uMaela kulindeleke abuyele ekujimeni neqembu ngenyanga ezayo kanti uKermit Erasmus uqale ngoLwesibili ukujima neqembu.
UMakhehleni Makhaula, owayedonseke umsipha wasethangeni, yena uzobuyela ngeviki elizayo ejimini.
Umdlali wasesiswini uKabelo Dlamini, owalimala eqakaleni ekuqaleni kwesizini noLesedi Kapinga bona baqale ngeviki elidlule ukujima.
“UMaela uza kahle futhi sekusondele ekutheni alulame ngemuva kokuvuma ukuhlinzwa ngoba ehlushwa umsipha obuklunyuka.
“Ukaputeni weBucs usenamaviki amane ehlenziwe futhi kulindeleke aqale ukujima neqembu ngoDisemba.
“UMakhaula yena usalelwe yiviki ukuthi alulame ngokugcwele njengoba esenezinsuku ezingu-18 elashwa.
“UKermit yena useluleme kulandela ukuklunyuka umsipha emdlalweni esahlula kuwo iKaizer Chiefs ngo 1-0.
“Ezinye izindaba ezinhle eziphuma egunjini labalashwayo ngezokuthi uKabelo Dlamini ubuyele ejimini ngeviki elidlule.
“UDlamini wayelimale ngo-Okthoba 12 ejimini,” kuchaza iPirates kulesi sitatimende.
IPirates ibuyela enkundleni ngoMgqibelo la izobhekana khona neRichards Bay FC eThekwini.
FUNDA NALA: UKannemeyer ukhala ngobuvaka kwawePSL asaba iDowns
Lo kuzoba wumdlalo wamagqubu njengoba iRichards Bay kuyiyo eyawashisa iPirates ijezi kwiCarling Knockout Cup.
