Ulale ebaliwe uGabuza ngecala elibi lokuhlukumeza owesifazane

SIHLE NGUBO

Owayengumgadli weBafana Bafana ne-Orlando Pirates, uThamsanqa Gabuza, ukhalelwe ngamasongo kasigonyela ngoLwesibili ntambama.

Ngokubika kweSunday World, uGabuza ozakhele udumo kwiLamontville Golden Arrows, ulandwe abakasidlodlo esolwa ngokuzama ukudlwengula, udlame nokubulala impahla.

“Lo mdlali webhola uboshwe ngoLwesibili ngemuva kophenyo lwamaphoyisa. 

“Usolwa ngokubulala ifoni ne-laptop yowesifazane oneminyaka engu-31,” kubika iSunday World.

UGabuza, osemabhukwini eTS Galaxy kumanje, ungomunye wabadlali abathandwa ngabalandeli kuleli ngenxa yamahlaya akhe. 

UGabuza kulindeleke avele enkantolo ngoLwesithathu ukuyozama ukuthola ibheyili.

Kwenzeka lokhu nje kusanda kugwetshwa umdlali wePirates, uThembinkosi Lorch, olahlwe yicala lokushaya owesifazane. 

ULorch ugwetshwe iminyaka emithathu kodwa walengiselwa yona iminyaka emihlanu, waphinde wahlawuliswa u-R100 000. 

Uyalelwe ukuba akhokhe u-R50 000 ngoLwesibili, bese le esele ayikhokhe ngamacozucozu ize iphelele. 

FUNDA NALA: Ikhefu libe lihle kwiPirates, kwelulame abebelimele

Le mali uzoyikhokha enhlanganweni ebhekelele inhalakahle yabesifazane, iPeople Opposing Women Abuse (Powa).