Bavotela izintwana zeDDC kwele-All Stars yeBlack Label Cup

Abalandeli benza obekungalindelekile njengoba bevotela izintwana zeDStv Diski Challenge ukuba zingene eqenjini leBlack Label Cup.

Leli qembu elizovotelwa ngabalandeli liyobhekana nompetha beCarling Knockout Cup emdlalweni oyoba sePeter Mokaba Stadium ngoJawuwari 6.

Ngokwezibalo zakamuva zamavoti, kukhona izintwana ezidlala kwiDDC ezifana noMfundo Vilakazi weKaizer Chiefs noSiphamandla Zikhali waMaZulu FC.

Ukuthi bavotela izintwana kukhomba ukuthi abalandeli bayafisa ukuzibona zinikwa ithuba emaqenjini amakhulu.

Nokho kwabahamba phambili ngamavoti ngabalindelekile vele, abeChiefs ne-Orlando Pirates.

Unozinti u-Itumeleng Khune nomgadli u-Ashley Du Preez nowePirates uKermit Erasmus yibo abaphambili ngamavoti.

U-Erasmus nguye ozihola phambili njengoba awakhe amavoti esengaphezu kuka-27 000, alandele uDu Preez onangaphezu kuka-25 000.

UKhune ulele isithathu nangaphezu kuka-23 000. UMonnapule Saleng wePirtes usendaweni yesine nangaphezu kuka-11 000.

Kozoqeqesha leli qembu umbango uphakathi kukaJose Riveiro wePirates noRulani Mokwena weMamelodi Sundowns noSteve Barker weStellenbosch FC.

Ozodlala naleli qembu labalandeli uzophuma phakathi kwaMaZulu, Richards Bay, TS Galaxy neStellenbosch.

Abalandeli abasafuna ukuvota, bengakwenza lokho ngokuthi bashaye u *120*660# bese balandela imiyalelo elandela lapho.

Bengakwenza futhi ngokuthi bangene kwi-webiste ethi: www.carlingblacklabelcup.co.za.

Lisame kanje selilonke iqembu:

GK: Itumeleng Khune (23,765 votes)
RB: Kutlwano Mohanwe (1,401 votes)
CB: Olisa Ndah (7,866 votes)
CB: Thabiso Nkabinde (2,671 votes)
LB: Paseka Mako (6,754 votes)
RM: Monnapule Saleng (11,293 votes)
CM: Siphamandal Zikahli (1,830 votes)
CM: Thulani Mabasa (3,404 votes)
LM: Mfundo Vilakazi (6,597 votes)
ST: Kermit Erasmus (27,266 votes)
ST: Ashley du Preez (25,087 votes)