Akpeyi: Ingcindezi yakwiChiefs iyabehlula abanye
UDaniel Akpeyi unolwazi olunzulu ngesisindo sejezi leKaizer Chiefs futhi uyakuqonda ukuthi kungani leli qembu ake wadlala kulo lidonsa kanzima.
Kuyacaca ukuthi kwiChiefs njengamanje kunabadlali abasindwa yijezi, okwenza benze amaphutha bese iqembu lingatholi imiphumela efanele.
Ngemuva kokuhlala amasizini amabili kwiChiefs, u-Akpeyi wakhonjwa indlela kanti manje usezitholele ikhaya elisha komakhelwane iMoroka Swallows.
IChiefs ilande uBrandon Petersen ukuzovala isikhala salo nozinti waseNideria kodwa indlela enza ngayo amaphutha seyimenze nyamanambana kubalandeli.
Yize u-Akpeyi ubengaqondisile kuPetersen ngesikhathi ekhuluma ngengcindezi, ukuvezile ukuthi ukudlala kwiChiefs kuyesinda kwabanye abadlali.
“Abadlali abefani kodwa kulaba abambalwa esengike ngahlangana nabo, le ngcindezi eza nokudlalela iqembu elikhulu njengeChiefs iyethusa.
“Uyajabula uma usayinwa yiKaizer Chiefs, kodwa uma sekumele ubhekane nengcindezi yokuyidlalela, kube nzima,” usho kanje lo nozinti.
Uveze lokhu ngesikhathi ekhuluma nabezindaba ngoLwesine ngaphambi komdlalo weSwallows neChiefs eDobsonville Stadium ngeSonto.
“Ukudlala phambi kwezinkumbi zabalandeli kudinga unique ukuze ukwazi ukungena enkundleni wenze kahle.”
Lezi zinkumbi zabalandeli akhuluma ngazo zilendeleke eDobsonville Stadium ngeSonto.
Emaqenjini aseSoweto, iSwallows iyona eyiqale kangcono isizini njengoba isendaweni yesihlanu nje.
Inamaphuzu angu-18 ngemuva kwemidlalo eyishumi kanti isalele ngayisithupha kwiMamelodi Sundowns ezihola phambili.
IChiefs yona izishayela ngesivinini sofudu njengoba emidlalweni engu-12 isaqoqe amaphuzu angu-14 nje.
“Bayawafuna amaphuzu kanti nathi siwadingela ukuqinisa indawo yethu kwilogi.
FUNDA NALA: Zondo: Ngeke abeChiefs/Bucs babuke iBafana egcwele abeDowns
“Ngakho lona kuzoba yimpi yamabhubesi amabili alimele. Kodwa siyakwazi okumele sikulindele, futhi sizilungiselele kahle.”
