Ubuyele ‘ekhaya’ kuMaZulu u-Augustine Mulenga
AmaZulu FC asekuqinisekisile ukubuya komdlali obechithwe ekupheleni kwesizini edlule u-Augustine “Diego” Mulenga oneminyaka engu-34.
Lo mdlali wayengomunye wababa nesandla ngesikhathi AmaZulu eqopha umlando eqeda endaweni yesibili kwiDStv Premiership ngesizini ka-2020/21.
Ukubuya kwakhe bekungalindelekile kwazise wahamba kabuhlungwana, iqembu limdedela kade esazama ukululama ekulimaleni.
Ube ngumdlali wesibili ukusayinwa yileli qembu njengoba kuvulwe iwindi likaJanuwari lokusayina abadlali.
Usuthu luqinise nangomdlali wasemuva kwesokunxele uSifiso Ngobeni obelekwe kwiMamelodi Sundowns.
U-Augustine Mulenga ufika kuMaZulu nje usuka kwiChippa United okuyiyo emlande ngakubo eZambia la abesebuyele khona ngemuba kokulaxazwa yileli qembu laseThekwini.
Usayine inontileka yezinyanga eziyisithupha enombandela wokuthi AmaZulu yiwo azothola ithuba lokuqala lokumsayina uma iphela.
UMulenga, owazakhela igama kwi–Orlando Pirates phambilini, uthe Usuthu luyohlale luyikhaya kuye ngenxa yendlela aphathwa ngayo efika kulo okokuqala.
“Uma ngicabanga wonke amakilabhu engiwadlalele phambilini, ngicabanga ukuthi ngiwujabulele kakhulu umsebenzi wami lapha kuMaZulu.
“Angizange nginanaze ngokubuyela Osuthiwni ngoba ngidlala ibhola ngendlela engijabulisao lapha,” kusho uMulenga.
“Abantu bakuleli dolobha (eThekwini) banomusa futhi bayasiseka kakhulu. Uthando lwabo luyamangalisa futhi ngifisa baqhubeke nalokho.
“Sengibheke ngabomvu ukusiza iqembu liqhubeke lapho ligcine khona ngonyaka odlule.”
UMengameli weqembu, uSandile Zungu, uhambe emazwini kaMulenga ethi nabo bakujabulele ukubuya kwalo mdlali.
“Sijabule kakhulu ukuphinde sibe no-Augustine ‘Diego’ Mulenga kuMaZulu.
“Wonke umuntu uyazi ukuthi wayebukhali kangakanani ngesikhathi edlala la kithi. “Washaya amagoli amaningi angalibaleki… Kuyadabukisa ukuthi kwadingeka ahambe…
“Kodwa kuthe uma kuvela ithuba lokumbuyisa, sashesha senza njalo.UDiego ubuyile.
FUNDA NALA: Lijikise u-R104 million obekufunwa ngawo uNgezana elaseRomania
“Silindele umlingo wakudala. Ujabule kakhulu ukuba lapha, ngakho-ke nathi, nawo wonke umndeni waMaZulu mawujabule.”
