ISekhukhune nesifiso sokuqinisa ngowayekwiPirates

Umgadli weMoroka Swallows, uGabadinho Mhango, usehehe amehlo abaqeqeshi beSekhukhune United.

Kuvela ukuthi umqeqeshi weBabina Noko, uLehlohonolo Seema umkhonze kakhulu lo mgadli.

UMhango uhlonzwe njengomunye wabadlali iSekhukhune efuna ukuqinisa ngabo ngesizini ezayo.

Kuthiwa le kilabhu yaseLimpopo ifuna ukwakha inqanawe yeqembu elizongena embangweni wezindebe ngesizini ezayo. 

Ngokubika kwePhakaaathi, leli qembu lihlose ukuletha uguquko olukhulu esikwatini salo. 

IBabina Noko ibizimisele ngokudlulela kowamanqamu weNedbank Cup njengangesizini edlule la yashaywa yi-Orlando Pirates. 

Kodwa ihlulwe AmaZulu FC ku-last 16. Lokhu sekwenze liqale ukuhlonza abadlali okuzoqiniswa ngabo. 

Kuthiwa abaphathi beqembu balangazelele indebe futhi bahlela ukuqasha abadlali abakholwa wukuthi bangasiza ekufezeni lokho okuhlanganisa nokulanda uMhango.

“UMhango ungomunye wabafana abahlonzwe njengabangafika babe wusizo olukhulu eqenjini. 

“Ungumgadli onekhono futhi onamava okudlala kwiDStv Premiership. 

“Uma umbuka manje uyabona ukuthi usakulangazelela ukudlala,” kusho umthombo.

“Akukhona ukuthi iqembu alinabo abadlali abakwazi ukwenza umsebenzi, wukuthi nje kumele kube nokuncintisana. 

“Bona (abaphathi) babona sengathi abanye abadlali bakhululekile ngenxa yokuthi ababangiswa muntu ezindaweni abadlala kuzo. 

“Uma ubheka isikwati, yiqembu elikhulu, elisondele kubadlali abangu-40. 

FUNDA NALA: OweMaritzburg usenethemba lokunqoba iChampionship

“Kodwa abanye abantu abakulweli ukudlala. Ngokutshala imali engaka eqenjini, kunesidingo sokuliqinisa.”