‘Ngisafuna ukudlala,’ kusho u-Itumeleng Khune

Obengunozinti weKaizer Chiefs, u-Itumeleng Khune, uthi akukapheli ngaye ebholeni futhi usafuna ukungena enkundleni adlale unobhutshuzwayo.

UKhune uhlukane neChiefs ekupheleni kwesizini edlule. Ubesehlale kuleli qembu iminyaka engu-20, wadlala imidlalo engu-280.

Lo nozinti alikho elinye iqembu aseke alidlalela ngaphandle kweChiefs, empilweni yakhe ethinta ibhola.

Ekhuluma neDiski Times, uthe yena usafuna ukuqhubeka nokudlala ibhola futhi ukulungele lokho uma kukhona iqembu elimfunayo.

“UNkulunkulu kuphela oyonquma ukuthi sekuphelile,” kusho uKhune kwiDiski Times.

“Njengamanje ngisafuna ukudlala. Ngizigcina ngiwumqemane futhi ngiyadlala lapho kudlalwa khona iqembu linabahlanu.

“Ngifuna ukuhlale ngilindile uma kungena ucingo olungathi ‘Itu sidinga usizo lwakho.’ Ngiyoya nakanjani lapho.”                                    

UKhune uveze ukuthi alikho iqembu aseke wazama inhlanhla kulona ngoba kukhona izinto asematasa ngazo.

“Okwamanje ngibeke umqondo kwiSABC, yiNedbank Cup, iTopbet neStudio 88,” kusho lo nozinti owayeyibamba kwiBafana Bafana 

“Njangamanje yilapho isinkwa sami siqhamuka khona. Kodwa uma kungakhona ongithintayo athi Itu buyela ebholeni, ngeke ngikwazi ukwenza konke lokhu ngoba kungamele ngibeke umqondo enkundleni.

“Kodwa njengoba ngingekho enkundleni okwamanje, ngizobeka umqondo kulezi izinto engizenzayo ezinkulu.

“Ngisekhona futhi uma uDenis Onyango ena-39 ebheke ku-40 esaqhubeka, kungani kumele ngijahe ngina-37 ngibheke ku-38? Yikho ngithi uma kukhona nje okuqhamukayo ngizoshona khona.”