ULesufi uveza okwenze wanikwa iMbombela oweNedbank Cup
Kwethuse abaningi ukuthi iPremier Soccer League iqoke iMbombela Stadium njengenkundla okuyodlalelwa kuyo umdlalo wamanqamu kwiNedbank Cup.
Le nkundla iseNelspruit, eMpumalanga kanti imenyezelwe emasontweni ambalwa edlule ukuthi izosingath lo mdlalo ngoJuni 1.
Manje undunankulu waseGauteng uPanyaza Lesufi uthi uyasazi isizathu esenze kuqokwe le nkundla ebingalindelwe muntu.
Uthi ukwenze kuqoke iMbombela, kugajwe iGauteng, wukuthi umasipala waseMbombela uthe ngeke ukhokhise ngisho indibilishi ngalo msebenzi.
“Isizathu esenze sahlulwa yiMbombela ekusingatheni lo mdlalo wukuthi bazowusingath mahhala,” kusho uLesufi etshela iCity Press ngeSonto.
“Njengohulumeni wesifundazwe, anginaso leso sikhungo futhi ngithembele komasipala abafuna ukukhokhisa iNedbank u-R500 000 ukuze kube namaphoyisa omgwaqo nje ewodwa.
“Ngakolunye uhlangothi abaphathi benkundla nabo bafuna ukukhokhisa.
“Ngakho, iMbombela ithi kubaxhasi, wozani futhi ngeke niwakhokhele amaphoyisa omgwaqo ngokunjalo nenkundla.”
Awakahlaluki ke amaqembu azodlala owamanqamu njengoba kusasele ukuthi kudlalwe eyandulela wona.
I-Orlando Pirates izodlala neChippa United kanti iStellenbosch izobhekana neMamelodi Sundowns la kuzophuma khona aya kowamanqamu.
Phambilini iPremier Soccer League yabeka izizathu ezihluke kakhulu zokusingatha umdlalo wamanqamu eMbombela.
“Kuyasijabulisa ukubuyisela owamanqamu weNedbank Cup eMbombela Stadium, okuyindawo enomlando webhola lezinyawo
“Kunomlando wemidlalo engasoze yalibaleka yeeNdebe yoMhlaba yeFifa ka-2010 ne-Africa Cup of Nations ka-2013.
“Lona wumcimbi obalulekile kwiPSL nozakwethu, iNedbank, njengoba sigqamisa ukuzinikela kwethu ngokubambisana ekutshaleni ibhola kuyo yonke iNingizimu Afrika.
“Ngaphezu kwalokho, ukusingatha umdlalo wamanqamu eMbombela kuzobhekelela nabathandi bebhola abavela emazweni angomakhelwane njengeMozambique naseSwatini…
FUNDA NALA: Ummeli uveza okusha ngowabulala uSenzo Meyiwa
“Ngaleyo ndlela kufukule ezokuvakasha esifundeni,” kuchaza uMato Madlala oyisikhulu esiphezulu esibambile kwiPSL.
