iDStv Premiership

I-Citizens ibukeka iyihlomele isizini ezayo yeDStv Premiership

NQOBIZITHA MNCWANGO

Iqembu laseKapa iCape Town City FC, limemezele uHaashim Domingo njengomdlali walo omusha emuva kokuba ehlukane neqembu laseMorocco, iRaja Casablanca.

Leli qembu lisanda kunqoba iligi ngaphansi komqeqeshi owaduma kakhulu lapha eNingizimu Afrika, ngesikhathi eqeqesha i-Orlando Pirates ngo-2019 kuya ku-2021, uJosef Zinnabauer.

UDomingo(28) ujoyina ezika-Eric Tinkler njengomdlali wesithathu onohlonze kwabazogijima esiswini saleli qembu ngesizini ezayo. Lo mdlali ufika elandela uKamohelo Mokotjo(33) obegijimina kwiSekhukhune United, odlale kakhulu emazweni aphesheya kwezilwandle okubalwa kuwona iNetherlands, yi-England ne-USA.

UMokotjo udlale imidlalo engu-28 kwiBafana Bafana kanti wayesuka ezinkulisa zeSupersport United, enedumela lokukhipha ukhilimu wabadlali ngaphansi kwezinkulisa zayo.

Ngaphandle kukaKamo iCity izobe ihlasela ngesikhwishikhwishi saseNamibia, uPrince Tjiueza (22), obuya eqenjini laseKosovo, iLlira Prezren, phesheya kwezilwandle.

Yambona ngesikhathi ekhwishizela esiswini seNamibia emqhudelwaneni i-Africa Cup Of Nations (AFCON) ngasekuqaleni konyaka. NoFortune Makaringe ochithwe yiPirates ukhonjwa khona kwiCitizens.

Leli qembu liqede endaweni yesihlanu ngesizini esanda kusongwa. Lizodlala neSekhukhune United koweMTN8 njengoba iqembu eliqede endaweni yesihlanu lidlala neqembu eliqede kweyesine kulo mqhudelwano wamaqembu ayisishiyagalombili aqede phezulu.