Kuzonyuka amathathu kulokhu esuka kwi-ABC Motsepe League
SIHLE NGUBO
ISouth African Football Association (Safa) izonyusa amaqembu amathathu kulokhu, esuka kwi-ABC Motsepe League eya kwiMotsepe Foundation Championship.
Lokhu kuqinisekiswe umengameli weSafa, uDanny Jordan, ngesikhathi ebuzwa ukuthi kuzokwenzekani kulokhu njengoba kunesikhala sesithathu kwiChampionship.
Okudale lokhu ukuxoshwa kweRoyal AM yiPremier Soccer League (PSL) ngenxa yezinkinga zemali ebibhekene naze, nokwenze yahluleka ukudlala imidlalo yeligi.
Ukuxoshwa kweThwihli Thwahla kuchaza ukuthi alikho iqembu leBetway Premiership elizodliwa yizembe liqonde ngqo kwiMotsepe Foundation Championship.
Iqembu leBetway Premiership elizoqeda endaweni ka-15 lizodlala imidlalo yokuhlunga ne-Orbit College neCasric Stars, abaqede endaweni yesibili neyesithathu kwiChampionship.
Okwamanje kusabukeka kuyiSuperSport United ehleli endaweni ka-15. Nokho leli qembu lasePitoli lisaqedela umdlalo walo neLamontville Golden Arrows owamiswa kungu 1-1. Umdlalo ungoLwesine ngo-12 emini eLucas Moripe Stadium.
Ngokujwayelekile amaqembu afinyelela kowamanqamu emidlalweni yokuhlunga kazwelonke ye-ABC Motsepe League, yiwona anyukela kwiChampionship.
Nokho kulokhu ithuba lizothi ukuvuleka njengoba emathathu amaqembu azonyuka ngenxa yokuxoshwa kweRoyal AM.
“Ngenxa yalokhu okwenzeka kwiPremiership iRoyal AM isuswa, nokuchaza ukuthi kunesinye isikhala, iPSL ibe isisicela ukuthi sinyuse amaqembu amathathu kwi-ABC Motsepe League,” kusho uJordan.
“Sibheke ukwenza kanjalo sikhuphule amaqembu amathathu kulo nyaka.
“Ngethemba ukuthi iKwaZulu-Natal izobe ikulawa maqembu. Ihlale igejeka kodwa kulokhu amathuba mathathu, ngeke ugejwe yiwona womathathu.”
Ngonyaka odlule iKwaZulu-Natal ibimelwe yiNjampela emidlalweni wokuhlunga eNorth West. Leli qembu lishaywe kowandulela owamanqamu yiHighbury yase-Eastern Cape.
Kulokhu lesi sifundazwe sizobe simelwe yiMidlands Wanderers okuyiyona eshaye uMkhambathini FC ngo 1-0 emdlalweni wokucacisa iqembu elizoya kweyokuhlunga kazwelonke.
Imidlalo kazwelonke yokuhlunga bekumele ibe seFree State kusukela ngoJuni 16.
Nokho sekuvela ukuthi ingase igcine iye KwaZulu-Natal ngenxa yezinkinga zemali ezibhekene nalesi sifundazwe (iFree State).
