Uhalala onguhhafu emaqenjini anyukele kwiMotsepe Foundation Championship
SIHLE NGUBO
Icala elithinta imidlalo yokuhlunga kazwelonke ye-ABC Motsepe League, elifakwe yiSinenkani FC yase-Eastern Cape, lizongena ngoJulayi 22.
I-Eastern Cape neLimpopo bebengekho kule midlalo ngakho bafuna ithathwe njengento engekho.
IGomora United yaseGauteng iyona ebe ngompetha ngemuva kokushaya i-The Bees yaseMpumalanga emdlalweni wamanqamu ngoMgqibelo.
Lo mdlalo wamanqamu udlalwe sekuvele kunesinqumo senkantolo yase-Eastern Cape, ebesithi ayimiswe imidlalo kuze kube kuphothulwa icala elifakwe yiSinenkani FC.
Lokhu kuchaza ukuthi iGomora, i-The Bees neMidlands Wanderers yaKwaZulu-Natal, bazodlala kwiMotsepe Foundation Championship ngesizini ezayo – okwamanje.
IWanderers ingene ngoba bekunyuka amaqembu amathathu kulokhu, ngenxa yembobo evuleke kuxoshwa iRoyal AM yiPremier Soccer League (PSL) ngesizini edlule.
Ngokuvamisile amaqembu afinyelela kowamanqamu we-ABC Motsepe League kuzwelonke, iwona anyukela esigabeni esiphezulu.
Kuyiwe kule midlalo yokuhlunga ePitoli kuvele kuneziphithiphithi eLimpopo nase-Eastern Cape.
Kulezi zifundazwe bekungakacaci ukuthi yimaphi amaqembu abezoya emidlalweni yokuhlunga ngenxa yamacala abengakaphothulwa.
Nokho iSouth African Football Association (Safa) inqume ukuqhubeka nale midlalo engekho amaqembu abemele lezi zifundazwe.
Ngokubambisana neNorth West (ebikhona kule midlalo) i-Eastern Cape ifake icala, ifuna ingabalwa indaba yale midlalo ngoba ayilitholanga ithuba lokuthumela iqembu ebelizoyimela.
Konke lokhu kuchaza ukuthi iGomora izohlala amasonto amabili ingazi noma ingompetha be-ABC Motsepe League ngempela yini noma kusazoqalwa phansi.
Lokhu kuzophinde kuphazamise ukuqala kwemidlalo yeMotsepe Foundation Championship, ngoba kuzoba nzima ukuhlela uhla lwemidlalo kungakacaci ngeGomora, i-The Bees neWanderers.
