ISundowns ethubeni lokuqopha umlando e-Egypt
SIHLE NGUBO
IMamelodi Sundowns kuseduze iqophe umlando ngokuba yiqembu lokuqala laseNingizimu Afrika ukunqoba iCAF Champions League okwesibili.
Abafana Ba’Style bazobhekana nePyramids SC yase-Egypt kowamanqamu womlenze wesibili weChampions League, e-30 June Stadium, eCairo, ngeSonto ngo-7 ebusuku.
Umlenze wokuqala uphele kungu 1-1 eLoftus Stadium, ePitoli, ngoMgqibelo odlule. Lokhu kubeke iPyramids ebuhleni njengoba ishaye igoli ekuhambeni.
Nokho abalandeli bebhola baseNingizimu Afrika banalo ithemba lokuthi ompetha beligi bazokwazi ukushaya amagoli adingekayo ukuze babuye nayo indebe e-Egypt.
ISundowns igcine ukuqukula iChampions League ngo-2016, nobekungokokuqala emlandweni wayo.
Kumasizini amabili edlule leli qembu lasePitoli liphume kweyandulela owamanqamu njengoba manje selikwazile ukudlala owamanqamu ngemuva kokuphuthelwa yiwona kulandelana.
Elinye iqembu laseNingizimu Afrika eselike lanqoba iChampions League yi-Orlando Pirates equkule le ndebe ngo-1995.
IBucs ikhishwe yiPyramids kowandulela owamanqamu nonyaka, sekuthenjiwe ukuthi owamanqamu uzodlalwa iyona neDowns.
Okumele ikuqaphele iSundowns uma isibhekene nePyramids, ukuthi leli qembu liyawashaya amagoli uma lidlalela ekhaya.
Kuyaziwa ukuthi umdlali wayo oyingozi uFiston Mayele oyenzele phansi iPirates eCairo kowandulela owamanqamu.
ISundowns yona izothemba ukuthi abadlali abafana noLucas Ribeiro, uMarcelo Allende, uThemba Zwane nabanye, bazobe bekulungele ngayo yonke indlela ukubhekana nempi e-Egypt.
Nasemuva iSundowns kuzomele iphaphame ngoba iPyramids ayilona iqembu elipaka ibhasi kodwa iyahlasela noma seyihamba phambili.
Ukuphela komdlalo ngo 0-0 kuzosho ukuthi iPyramids isingompetha ngoba ishaye igoli ekuhambeni.
Nokho uma umdlalo kungenzeka uphele ngo 1-0 (kunqoba iDowns) noma ngo 2-2 iSundowns izobuya nayo indebe bese igqize ngenkanyezi yesibili.
