IBafana Bafana kumele ibhukule emidlalweni yomkhulajezi

SIHLE NGUBO

Ukudlulela phambili kwi-Africa Cup of Nations (AFCON) kweNingizimu Afrika, kuchaza ukuthi kumele ishintshe ukwenza, izibambe ziqine.

IBafana Bafana iqinisekise ukuthi iyadlulela kwiLast 16 ye-AFCON, kulandela ukushaya omakhelwane iZimbabwe ngo 3-2.

Nokho okuhlalukayo ukuthi ezikaHugo Broos azikadlali ibhola elihle selokhu uqalile lo mqhudelwano obanjelwe eMorocco.

Ngesikhathi ibhekene neWarriors ngoMsombuluko, iBafana Bafana ibukeke ibamba iyeka esiswini, lapho bekudlala khona uTeboho Mokoena noSiphephelo Sithole.

Lokhu kuphoqe uBroos ukuthi amkhiphe uSithole ngesiwombe sesibili, wafaka uBathusi Aubass.

Lo mqeqeshi waseBelgium uphawulile ngokukhipha kwakhe uSithole ngemuva komdlalo.

“UYaya ubenza kahle uma sivimba emuva, kodwa uma ephethe ibhola belimlahlekela isikhathi esiningi,” kusho uBroos.

“Namaphasi aya emuva, njalo bebenika ibhola izitha ngakho bekumele senze okuthile.

“Ngesikhathi sekukhona uBathusi bese kungcono ngesiwombe sesibili. Bese sikwazi ukugcina ibhola nokuphaselana sekungcono.

“Sidlale kangcono futhi kodwa besilokhu sizifaka enkingeni, futhi lokho kumele kuphele.”

IBafana Bafana seyizobhekana noyedwa phakathi kwe-Ivory Coast, yiCameroon noma iMozambique, emdlalweni weLast 16 ngeSonto.

Amaqembu asedlulele phambili yiMorocco, yi-Egypt, iNingizimu Afrika, iMali, iNigeria, iSenegal, iDR Congo, iBenin, i-Algeria i-Ivory Coast, iCameroon, neMozambique.

Lawo aseqoqe imithwalo abuyela emakubo yiZimbabwe, iBotswana, iZambia neGabon.