Owe-Arrows ukitazwa ukubona amaqembu aseKZN ebhukulile kule sizini

SIHLE NGUBO

Uchazwa ukuzimisela kwamaqembu ebhola aKwaZulu-Natal kule sizini, umqeqeshi weLamontville Golden Arrows, uManqoba Mngqithi.

Amaqembu akulesi sifundazwe enza kangcono kakhulu kwiBetway Premiership, selokhu kuqale isizini ka-2026.

Njengamanje alikho iqembu eliphebeza izembe phakathi kwe-Arrows, AmaZulu FC, yiRichards Bay FC neDurban City FC, kwiPremiership.

NakwiMotsepe Foundation Championship kuhamba kahle kakhulu, njengoba iMilford FC, yaKwaZulu-Natal, isazihola phambili kwilogi.

Lokhu kuqinisa ithemba lokuthi angase abe mahlanu amaqembu akulesi sifundazwe azogijima esigabeni esiphezulu, iBetway Premiership, ngesizini ezayo.

Njengoba kuqhubeka imidlalo yeNedbank Cup ka-2026, izinto zisayihambela kahle kakhulu iKwaZulu-Natal.

Wonke amaqembu ayisithupha akulesi sifundazwe, abedlala kwiLast 32 yeNedbank Cup, adlulele phambili.

Lapha kubalwa i-Arrows, AmaZulu, iBay, iCity, iMilford, noMkhambathi FC.

UMngqithi uthi kuyakhuthaza kakhulu ukubona amaqembu aKwaZulu-Natal ebhukulile kule sizini.

“Kuyangijabulisa kakhulu ukubona amaqembu aseKZN enza kahle yonke indawo, hhayi kweyomkhumulajezi kuphela,” kusho uMngqithi oke waqeqesha iMamelodi Sundowns.

“Ngicabanga ukuthi kunokuthuthuka kakhulu uma ubuka indlela la maqembu adlala ngayo, ikakhulukazi ekunikeni abadlali abasebancane ithuba.

“IDurban City inenqwaba yabadlali abenyukayo. URonnie Gabriel noPapi Zothwane benza kahle kwiRichards Bay, no-Arthur Zwane wenza kahle kuMaZulu.”

Ukuba khona kwamaqembu ayisithupha aKwaZulu-Natal, kwiNedbank Cup, kunika ithemba lokuthi iseminingi imidlalo ezoza kulezi sifundazwe yalo mqhudelwano.

Ngaphandle kwalokho kubhekwe ukuthi kube khona amaqembu aseKZN afinyelela kweyandulela owamanqamu, kanjalo kowamanqamu uqobo.

Amaqembu azogadulisana kwiNedbank Cup Last 16, azoqhathwa ngoLwesithathu ngo-7 ebusuku, ezindlini zeSuperSport, eRandburg, eGauteng.