Kusinde Usuthu ne-Arrows eqala ngesibhaxu awaseKZN kwiPremiership
SIHLE NGUBO
Amaqembu aKwaZulu-Natal ayibamba kwiBetway Premiership, akuwahambelanga kahle emidlalweni yokuqala yeligi njengoba kukhale isibhaxu kwamathathu awo.
Ngempelasonto edlule lusukile ushikishi lwemidlalo yesizini entsha, kanti yiMamelodi Sundowns neMarumo Gallants kuphela abangadlalanga.
Umdlalo weDowns neGallants uhlehlisiwe kulandela ukudlula emhlabeni kukaJayden Adams, obedlalela leli qembu laseChloorkop.
Lokhu kuholele ekutheni kuphazamiseke imidlalo yokulungisela isizini entsha yaBafana Ba’Style, ababuye ngeSonto ohambeni lwase-Austria.
Nokho okugqame ngempelasonto ukuthi amaqembu aKwaZulu-Natal aqale ngebatha emidlalweni yeligi, ngaphandle koSuthu.
Kuqale ngeMilford FC ebibhekene nabavikela isicoco seligi i-Orlando Pirates, e-Orlando Amstel Arena, ngoMgqibelo.
Omakoti beligi, iMilford ezinze eRichards Bay, babingelelwe ngesibhaxu sika 2-0 ompetha beligi, iBucs.
Ngawo uMgqibelo iDurban City ihlulekile ukuthola amaphuzu ngesikhathi ithelwa othulini ngo 1-0 yiSekhukhune United.
ILamontville Golden Arrows yona ikwaze ukuthola iphuzu elilodwa ngesikhathi ibambana neChippa United ngo 0-0 ngoMgqibelo.
Kuphinde kwangahamba kahle ngeSonto ngesikhathi iRichards Bay FC ishaywa yiPolokwane City ngo 2-1, eMhlathuze Sports Complex.
Le nkundla izoke ime ukusetshenziswa njengoba izobe ilungiswa kusukela ngo-Agasti 13.
Usuthu yilona iqembu laKwaZulu-Natal eligolozile ukushaywa njengoba luthele othulini iStellenbosch FC ngo 1-0, eSugar Ray Xulu Stadium, ngoMgqibelo.
Akungabazeki ukuthi kumjabulisile ukuvula ngokuthola amaphuzu amathathu umqeqeshi waMaZulu, u-Arthur “10111” Zwane.
Yize ezakhe ziqale ngesibhaxu kodwa umqeqeshi weMilford, uXanti Pupuma, uthe ujabule ngendlela abadlale ngayo abafana bakhe.
“Angiphoxekile nakancane…uma singadlala kanje kuyo yonke imidlalo sizobe sikhona lapha ekupheleni kwesizini,” kusho uPupuma kwiSuperSport TV ngemuva komdlali.
Ngempelasonto kushintsha ukudla epuletini njengoba kuzodlalwa ama-quarterfinal eMTN8.
Kuzoqala iPirates ezokwamukela iDurban City, e-Orlando Amstel Arena, ngoMgqibelo ngo-3 ntambama.
ISundowns izodlala umdlalo wayo wokuqala wesizini uma seyitholana phezulu nePolokwane City, eLucas Moripe Stadium, ngoMgqibelo ngo-6 ntambama.
Usuthu yilona iqembu laKwaZulu-Natal elizodlalela ekhaya uma selutholana phezulu neSekhukhune United, eChatsworth Stadium, ngeSonto ngo-3 ntambama.
Le midlalo yama-quarterfinal izovalwa oweKaizer Chiefs ne-Arrows, eFNB Stadium, ngeSonto ngo-6 ntambama.
Amathikithi emidlalo yama-quarterfinal yeMTN8 aqalile ukudayisa ngoMsombuluko.
I-Pirates iyona evikela le ndebe yeMTN8 eyithathe okwesithathu kulandelana ngesizini edlule.
